Pavlodarda magnıt arqyly esirtki jasyryp júrgen 23 jastaǵy kúdikti ustaldy

ASTANA. KAZINFORM – Pavlodarda metall betterge magnıtpen bekitilgen esirtki oramalaryn jasyryp júrgen 23 jastaǵy er adam ustaldy, dep habarlaıdy Polisia.kz.

Pavlodar PD esirtki qylmysyna qarsy is-qımyl basqarmasy men oblystyq prokýratýranyń birlesken jedel is-sharasy barysynda kúdiktiniń garajdardyń temir qaqpalaryna esirtki salynǵan paketterdi magnıt kómegimen jabystyryp otyrǵany anyqtaldy. Ol jasyrǵan oryndardy sýretke túsirip, koordınattaryn jiberip otyrǵan.

Ustaý kezinde kúdiktiniń janynan aq tústi untaq salynǵan, ızolentaǵa oralǵan bes klıpboks tabyldy. Sonymen qatar, onyń smartfony tárkilendi. Onda tyıym salynǵan zattar jasyrylǵan oryndardyń koordınattary men sıpattamalary saqtalǵan.

Polıtsııa dereginshe, keıin Pavlodar aýmaǵynda jedel ýákilder esirtki jasyrylǵan 25 jasyryn oryndy tapty. Árbir oramda metall betterge jabystyrýǵa arnalǵan shaǵyn magnıt bolǵan. Bul oramalar qubyrlarǵa, esikterge jáne ózge de temir betterge bekitilip otyrǵan.

Zertteý nátıjesinde tárkilengen zattardyń jalpy salmaǵy 17 gramnan asatyn sıntetıkalyq esirtki ekeni belgili boldy. Bul kólem zań boıynsha asa iri mólsher sanalady.

Qazirgi ýaqytta esirtki quraldary men psıhotroptyq zattardy zańsyz daıyndaý, óńdeý, óndirý jáne ótkizý faktisi boıynsha sotqa deıingi tergeý júrgizilip jatyr. Kúdikti qamaýǵa alyndy.

Aıta keteıik, SQO-da bıyl esirtki taratyp, satqan 132 adam ustaldy.