Pavlodarda lombard qyzmetkeri 16 mln teńgeni qumar oıynǵa salyp jibergen
PAVLODAR. KAZINFORM — Áıel adam lombardta aǵa taýar mamany — baǵalaýshy-kassır bolyp jumys istegen jáne materıaldyq jaýapty tulǵa bolǵan. Bıylǵy naýryz aıynda ol seıften klıentterge tıesili altyn áshekeılerdi alyp, olardy ózge lombardtarǵa ótkize bastaǵan.
Qyzmetker lombardan jalpy sany 26 buıymdy urlap satqan. Olardyń arasynda saqınalar, syrǵalar, shynjyrlar, alqalar bolǵan. Túsken aqshany onlaın-kazınoda báske jumsaǵan.
— Osylaısha, urlanǵan altyn buıymdardyń jalpy quny 5 795 390 teńgege jetken. Túsken aqshaǵa kóbirek qarajat utyp alý maqsatynda onlaın-kazınoda oınaı bastaǵan jáne utqan jaǵdaıda buıymdardy qaıta satyp alyp, ornyna qoıýdy kózdegen. Alaıda ol oıyndarda utylyp, aqshalaı qarajatynan aıyrylyp otyrǵan, — delingen Pavlodar qalasynyń qylmystyq ister jónindegi aýdanaralyq sotynyń aıyptaý isinde.
Aqshasy taýsylǵannan keıin áıel mamyr aıynda odan da iri kólemde qarajatty jymqyrǵan. ıAǵnı lombard kassasynan 10 mln teńgeden astam aqshany alyp ketken. Qarajattyń joǵalǵany anyqtalǵan soń, qyzmetkerge qatysty qylmystyq tergeý bastalǵan.
Sotta áıel óz kinásin tolyq moıyndady. Oǵan raqymshylyq týraly zańnyń qoldanylýyn eskere otyryp, 3 jyl 4 aıǵa bas bostandyǵyn shekteý jazasy taǵaıyndaldy. Sonymen qatar, áıel keltirilgen shyǵyndy óteýge mindetteldi. Shyǵynnyń jalpy somasy 16 mn teńgege jýyq.
Eske sala keteıik, Astanada aýrýhana qyzmetkeri naýqastyń altynyn urlap, lombardqa ótkizgen.
