Pavlodarda qylmystyq top Eýropadan esirtkini poshtamen alyp otyrǵan
PAVLODAR. QazAqparat - Pavlodarda Eýropadan ınternet dúkeni arqyly esirtki tasydy degen kúdikpen eki adam qamaýǵa alyndy, dep habarlaıdy QazAqparat pavlodarnews.kz saıtyna silteme jasap.
«Basqarma qyzmetkerleri esirtki saýdasymen aınalysty degen kúdikpen toptyń múshelerin ustady. Olar Eýropadan sıntetıkalyq esirtkilerdi tasyǵan. Ustalǵandar 20-30 jas aralyǵyndaǵy eki azamat. Esirtkini kúdiktiler saıttarǵa jarnama berý arqyly satyp otyrǵan. Tintý barysynda 2 keliden astam, quny 12 mıllıon teńgege jýyqtaıtyn LSD (aqyl-esten aıyratyn), ekstazı, spice sııaqty 1500 birrettik mólsherdegi sıntetıkalyq esirtki tárkilendi», - dedi oblystyq Polıtsııa departamenti esirtkige qarsy kúres basqarmasynyń basshysy Balǵabaı Qaparov.
Onyń aıtýynsha, esirtkini kúdiktiler Eýropadan poshta arqyly sálemdeme retinde alyp otyrǵan. Polıtseıler olardy bir jyldan astam ýaqyt boıy nazarda ustap, «jasyryn satyp alýshy» ádisimen ınternetpen esirtkige tapsyrys ta bergen.
«Arnaıy sharalar atqarylyp, tekseristik satyp alýlar júrgizildi. Olardyń ózderiniń ınternet dúkenderi bar. Sol arqyly saıttarǵa jarnama bergen», - dedi B.Qaparov.
Qazirgi kezde QR QK-niń 297-babyna sáıkes sotqa deıingi tergeý amaldary júrgizilýde. Atalǵan bap boıynsha 15-20 jylǵa deıin bas bostandyǵynan aıyrý sanktsııasy qarastyrylǵan. Kúdiktiler Pavlodar qalasy polıtsııa basqarmasynyń ýaqytsha ustaý ızolıatoryna qamaldy.
Aıta keteıik, jyl basynan beri óńirde esirtkige qatysty 75 qylmys tirkelip, 400 keliden astam esirtki túrleri tárkilendi. Sondaı-aq, 30 esirtki saýdalaý núktesi anyqtalyp, 32 adam ustalǵan.
