Pavlodarda qylmystyq top 500 mln teńgeni qolma-qol aqshaǵa aınaldyrǵan

NUR-SULTAN. QazAqparat – Pavlodarda 500 mln teńgeni qolma-qol aqshaǵa aınaldyrǵan qylmystyq top ustaldy. Bul jaıynda QR Qarjylyq monıtorıng agenttiginen málim etti, dep habarlaıdy QazAqparat tilshisi.

Vedomstvo málimetinshe, Pavlodar oblystyq Ekonomıkalyq tergep-tekserý departamenti is júzinde oryndalmaǵan jumystarǵa, kórsetilmegen qyzmetterge jáne jóneltilmegen taýarlarǵa jalǵan shot-faktýralardy jazyp berýmen aınalysqan uıymdasqan qylmystyq toptyń jolyn kesti.

Quramynda 11 múshesi bar top Pavlodar qalasynyń aýmaǵynda 4 jyl boıy josyqsyz salyq tóleýshilerge salyq tóleýden jaltarýǵa kómektesip kelgen.

«Top músheleri baqylaýdaǵy 20 fırma arqyly jalǵan býhgalterlik qujattardy jazyp berýmen aınalysqan. Memleketke atalǵan toptyń zańǵa qaıshy áreketinen 500 mln teńgeden astam somaǵa tólenbegen salyqtar túrinde zalal keltirildi. Kináli tulǵalar 1,5 jyldan 6,5 jylǵa deıingi merzimge sottaldy. Memleket kirisine 4 páter jáne 3 avtokólik tárkilendi», - dep atap ótedi agenttikten.