Pavlodarda «Kvazar» saýda úıinen órt shyǵyp, 150 adam evakýatsııalandy

PAVLODAR. KAZINFORM - Órtten zardap shekkender joq. Qutqarýshylardyń kómegimen saýda úıinen 150-deı adam syrtqa shyǵaryldy.

Pavlodardaǵy iri saýda úıleriniń biri – «Kvazar» ortalyq bazarynda elektr symdarynyń tuıyqtalýynan órt shyqqan. Bul týraly óńirlik tótenshe jaǵdaılar departamentiniń baspasóz qyzmetinen habarlady.

«11 qyrkúıek kúni saǵat 13:18-de «Kvazar» saýda úıinde órttiń paıda bolǵany týraly habarlama tústi. Oqıǵa ornyna jedel túrde órtke qarsy bólimsheler jiberildi. Saýda úıinde ornalasqan býtıkterdiń birinde elektr symdarynyń oqshaýlaǵyshy órtengeni anyqtaldy. Tilsiz jaý jyldam sóndirildi. Jalyn shamamen 0,2 sharshy metrdi sharpyǵan. Órtke qarsy brıgadalar kelip jetkenshe saýda úıindegi 150-deı adam syrtqa shyǵaryldy. Zardap shekkender joq», - dep málimdedi Tótenshe jaǵdaılar departamentinen.

Oqıǵa ornyna órtke qarsy qyzmettiń 33 qyzmetkeri men 9 tehnıka jumyldyrylǵan.

Eske sala keteıik, naızaǵaı saldarynan Ertis ormanynan 6 ret órt shyqqan.