Pavlodarda kúıeýi órtep jibergen áıel kóz jumdy
PAVLODAR. QazAqparat - Denesiniń 50 paıyzyn kúıik shalǵan áıeldiń jaǵdaıy birneshe kún buryn kúrt nasharlap ketken, dep habarlaıdy QazAqparat Pavlodarnews.kz -ke silteme jasap.
Pavlodar oblystyq densaýlyq saqtaý basqarmasynyń málimetinshe, Rozovka aýylynyń turǵyny aýrýhanada kóz jumǵan. Buǵan deıin onyń jaǵdaıynyń aýyr ekenin dárigerler aıtqan bolatyn.
- Naýqastyń jaǵdaıy sońǵy kúnderi nasharlap ketti. Osyǵan baılanysty ol jasandy tynys alý apparatyna qosylǵan bolatyn. Ókinishke qaraı, áıel búgin qaıtys boldy, - dedi oblystyq densaýlyq saqtaý basqarmasynyń baspasóz qyzmeti.
34 jastaǵy áıeldi ishimdikke toıyp alǵan kúıeýi órtegen. Oblystyq polıtsııa departamentiniń málimetinshe, erli-zaıyptylar oqys oqıǵaǵa deıin ózara urysqan. Keıin áıeli mas kúıinde kólik tizgindemek bolǵan kúıeýine ruqsat bermegen. Ol tońazytqyshta turǵan spırtti alyp, áıeline shashyp, ottyqpen ot qoıǵan.
Órtengenine qaramastan áıel kúıeýiniń ústinen aryz jazýdan bas tartqan. Alaıda quqyq qorǵaý organdary densaýlyqqa qasaqana aýyrlyǵy ortasha zııan keltirgeni úshin sotqa deıingi tergeýdi bastady.
Bolǵan jaǵdaıǵa qaramastan,otbasynyń kórshileri erli-zaıyptylardyń tatý bolǵanyn aıtady. Olardyń ortaq úsh balalary bar. Qazir olar atasy men ájesiniń qolynda.
