Pavlodarda Kýtýzov kóshesin Tuńǵysh Prezıdenttiń esimimen ataý usynyldy
PAVLODAR. QazAqparat - Estaı atyndaǵy mádenıet saraıynda Pavlodar oblysynyń ákimi Bolat Baqaýovtyń turǵyndar aldyndaǵy eseptik kezdesýi ótti. Kezdesý barysynda oblys ortalyǵyndaǵy kósheni Memleket basshysynyń esimimen ataý týraly usynys jasaldy, dep habarlaıdy pavlodarnews.kz.
Mundaı pikirdi qoǵamdyq keńestiń tóraǵasy Aleksandr Rıýmkın bildirdi.
«Sońǵy kezderi qalany kóriktendirý boıynsha kóp jumys atqarylýda, - dedi Aleksandr Rıýmkın. - Ásirese, Kýtýzov kóshesi aıtarlyqtaı kórkeıe tústi. Kóriktendirýge kóp kóńil bólinip jatqany úshin rızamyz. Almaty qalasynda Fýrmanov kóshesin aýystyrǵany belgili. Bul suraq Shymkentte de kóterildi. Meniń oıymsha, Pavlodar qalasyndaǵy ádemi kóshelerdiń biri Qazaqstannyń Tuńǵysh Prezıdentiniń esimimen atalǵany durys».
Qalanyń buryńǵy meriniń pikirimen kelisken Bolat Baqaýov bul suraqty qarastyrýǵa ýáde berdi.
«Kóshe ataýyn aýystyrý máselesi jıi kóteriledi, - dedi aımaq basshysy. - Qoǵamdyq keńeske qalanyń tynys-tirshiligine belsendi qatysqany úshin alǵys bildiremiz. Ásirese, qalanyń zamanaýı kelbetin qalyptastyrýǵa kóp kóńil bólinýde. Degenmen kóshe ataýyn aýystyrý máselesine saqtyqpen qaraý qajettigin jaqsy túsinesiz. Jalpy, sizdiń oıyńyzdy quptaımyz».
Eske salaıyq, Kýtýzov kóshesiniń ataýyn aýystyrý suraǵy osydan bir jyl buryn oblys ákiminiń eseptik kezdesýinde kóterilgen bolatyn. Ol kezde qoǵam qaıratkeri, burynǵy qala ákimi Evgenıı Azarov eń keń kósheni Astana qalasynyń atymen ataýdy usynǵan. Alaıda, elordanyń esimi Pavlodardyń eski kóshesi Lenınniń ornyna beriletin bolyp sheshildi.
Kýtýzov kóshesi 60-jyldary boı kótergen. 1812 jylǵy Frantsýz-Orys soǵysynyń 150 jyldyǵyna oraı orys qolbasshysynyń esimi berilgen. Bul kóshe áýejaı men temir jol jáne avtovokzaldaryn jalǵaıdy.
