Pavlodarda qutqarýshylar órtengen úıden es-tússiz jatqan er adamdy alyp shyqty
PAVLODAR. QazAqparat - Pavlodarda bes qabatty turǵyn úıdiń páterinde órt shyǵyp, úıdiń kireberisinde ıis tıip, kúıik shalǵan er adam tabyldy, dep habarlaıdy QazAqparat.
«14 sáýir kúni saǵat 00.02-de Pavlodar qalasyndaǵy Qaıyrbaev kóshesindegi 36-úıde órt shyqqany týraly habarlama kelip túsken. Eki bólmeli páterdiń úlken bólmesinde múlik-jıhaz órtengen. Jalyn 16 sharshy metr aýmaqty sharpydy», - dep habarlady tilshilerge Pavlodar oblystyq Tótenshe jaǵdaılar departamentiniń baspasóz qyzmetinen.
Órt sóndirýshiler besinshi qabattyń satysynan ıis tıip ýlanǵan, qolyn, basyn, moıynyn ekinshi-úshinshi dárejeli kúıik shalǵan 1967 jylǵy er adamdy tapty. Er adam es-tússiz birinshi qalalyq aýrýhanaǵa jetkizildi, dep habarlady TJD-dan.
«Órt sóndirýshiler kelgenshe 10 adam ózdiginen syrtqa shyqqan. Órt saǵat 00:38-de sóndirildi. Qazir órttiń neden shyqqany, keltirilgen shyǵyn anyqtalyp jatyr», - dep naqtylady departamenttiń baspasóz qyzmetinen.
Oqıǵa ornyna jeke quramnyń 30 adamy men 10 tehnıkasy, Apattar medıtsınasy órt sóndirý qyzmetkerleri, 102 jáne 103, qalalyq elektr jelisi qyzmetteri bardy.
