Pavlodarda qurylys kompanııalary 120 mln teńge salyqty jasyryp qalǵan

ASTANA. KAZINFORM — Pavlodar oblysynda birqatar kompanııa jyljymaıtyn múlik nysandaryn satý boıynsha mámilelerdi salyqtyq eseptilikte kórsetpegen. 

Prokýrorlar qadaǵalaý qyzmeti barysynda qurylys salasynda tabysty júıeli túrde jasyrý faktilerin anyqtady. 

Birqatar kompanııa jyljymaıtyn múlik nysandaryn satý boıynsha mámilelerdi salyqtyq eseptilikte kórsetpegen, bul bıýdjetke eleýli shyǵyn keltirdi.

— Atap aıtqanda, qurylys kompanııalarynyń biri turmystyq qyzmet kórsetýge arnalǵan 43 nysandy satqan. Alaıda bul týraly málimetter deklaratsııada kórsetilmegen.

Saldarynan kompanııa salyqtyq mindettemelerin jasyryp, 77,8 mln teńge kóleminde korporatıvtik tabys salyǵyn tólemegen, — delingen prokýratýra habarlamasynda.

Osyndaı zań buzý taǵy 12 qurylys kompanııasy boıynsha anyqtaldy.

Pavlodar oblysy prokýratýrasynyń qadaǵalaý sharalary nátıjesinde 120 mln teńge bıýdjetke qaıtaryldy. Bul baǵyttaǵy jumys jalǵasyp jatyr. 

Aıta ketelik Qostanaı oblysynda qurylys talaptaryn buzǵan kompanııalar jaýapkershilikke tartyldy.