Pavlodarda Qurban aıttyń alǵashqy kúninde birneshe qazan palaý taratylady

PAVLODAR. QazAqparat – Pavlodarlyqtar Qurban aıtty saıabaqta merekeleıdi, dep habarlaıdy QazAqparat tilshisi Pavlodarnews.kz saıtyn silteme jasap.

Máshhúr Júsip atyndaǵy ortalyq meshittiń baspasóz qyzmeti taratqan aqparatqa sáıkes, 9 shilde kúni saǵat 7:00-de oblystyń barlyq meshitterinde Aıt namazy oqylady.

Al, saǵat 7:30-da «Qulager» ıppodromynda qurbandyq shalý bastalady. Maldy arnaıy oqytylǵan qasapshylar soıady. Ortalyq meshittiń baspasóz hatshysy Amantaı Toıshybaıulynyń aıtýynsha, qurbandyqty oflaın da, onlaın da shalýǵa bolady.

Sodan keıin saǵat 14:00-de qalalyq saıabaqta «Qurban aıt – baqyt merekesi» ataýymen kópshilik shara bastalady. Balalar arasynda saıystar uıymdastyrylyp, oıyndar oınatylady. Meshit qyzmetkerleri ýaǵyz aıtady.

Meshittiń baspasóz qyzmetinen habarlanǵanyndaı, 10 qazan palaý ázirlenip, merekelik sharaǵa kelýshilerge taratylady.

Aıta ketsek, Qyzyljar jáne Jetekshi aýyldarynda jańa meshitter ashylady.

Foto: mazhab.kz