Pavlodarda Qurban aıt kúnderi 20 qazan palaý pisiriledi
Máshhúr Júsip meshitiniń naıb ımamy Qanat Qabdykárimulynyń aıtýynsha, merekelik sharalar 11 tamyz kúni saǵat 14:00-den 18:00-ge deıin jalǵasady.
«Jyldaǵydaı saıabaqtaǵy sharamyz QMDB-nyń oblysymyzdaǵy ókil ımamy Joldas Qospaqulynyń quttyqtaýymen bastalady. Oblys ortalyǵynda ornalasqan 7 meshittiń árqaısysy úsh qazan palaý pisiredi», - dedi Qanat Qabdykárimuly.
Sondaı-aq keshki saǵat 18:00-ge deıin kúres, arqan tartys jáne ózge de ulttyq sport túrlerinen jarystar ótkizilip, balalarǵa syılyqtar taratylmaq.
Aıta keteıik, Qurban aıt merekesi oblysymyzdaǵy barlyq meshitterde tańǵy saǵat 7:00-de aıt namazyn oqýmen bastalady.
Qalalyq ákimdiktiń málimetinshe, mereke kúnderi ıaǵnı, 11, 12 jáne 13 tamyzda Pavlodar qalasynda qurbandyq shalý rásimin uıymdasqan túrde ótkizý úshin «Qulager» ıppodromynda (Pavlodar q., Soltústik ónerkásiptik aımaq) arnaıy alań anyqtaldy. Onda mal soıý jáne satý qyzmetteri usynylady. (№ 1, 6, 7, 10 tramvaılary júredi). Jumys ýaqyty: saǵat 08.00-den bastalady.
