Pavlodarda quny 315 mln teńgeniń zańsyz taýary joıyldy
ASTANA. KAZINFORM — Ekonomıkalyq tergeý departamentiniń qyzmetkerleri 45 myńnan asa veıptiń kózin joıdy, dep habarlaıdy Kazinform agenttiginiń menshikti tilshisi.
Sharany Pavlodar oblysy Ekonomıkalyq tergeý departamentiniń (ETD) qyzmetkerleri uıymdastyrdy. Oǵan qoǵam belsendileri, sondaı aq jergilikti ýnıversıtet stýdentteri qatysty.
Atap ótilgendeı, zańsyz taýardyń edáýir bóligi jetkizýshilerden tárkilengen. Ókinishke qaraı, olar buǵan deıingi reıd kezinde eskertý alǵanyna qaramastan, zańsyz veıp satýyn toqtatpaǵan.
— Jazda is-sharalardy ótkizgen kezde biz alǵashqy tintý jumystaryn júrgizip, kúdikti tulǵalardy anyqtadyq. Keıin tergeý barysynda bul adamdar zańsyz taýarlardy satýymen áli de aınalysyp júrgeni belgili boldy. Osyǵan baılanysty biz jedel-izdestirý is-sharalaryn ótkizdik, qoımalardy anyqtadyq, tintý júrgizdik. Zańsyz aınalymnan kezekti partııa tárkilendi. Biz sol partııa boıynsha saraptamalar júrgizip, veıp ekenin dáleldedik, — dedi Pavlodar oblysy boıynsha ETD basshysynyń orynbasary Ǵalıasqar Qasymov.
Búgin veıpterdi balǵamen shaǵyp, kózin joıý jumystary bastaldy. Alaıda bul kóp ýaqyt alatyn tásil eken, sondyqtan olardy usatqyshpen joıý týraly sheshim qabyldandy.
Pavlodar oblysyna mundaı taýar negizinen Astana men Almatydan keledi. Onda veıpter úlken qoımalarda saqtalady, bul rette zańsyz ónim Qazaqstanǵa negizinen Qytaıdan jetkiziledi.
Kamıla Múlik