Pavlodarda quny 18 mln teńge bolatyn veıpter tárkilendi
PAVLODAR. KAZINFORM - Ekibastuzdaǵy páterlerdiń birinen polıtseıler 2500-ǵa jýyq elektrondy temeki taýyp aldy. Tyıym salynǵan zattardy zańsyz satyp, taratqany úshin 20 jastaǵy jigit ustaldy.
Polıtseıler veıpterdi Ekibastuz qalasy Sheshembekov kóshesindegi kópqabatty úıdiń páterinen tapqan. Zańsyz taýardyń partııasy keıinnen satýǵa arnalǵany anyqtalǵan. Kúdikti tanymal messendjerler men áleýmettik jelilerdiń arnalaryn qoldana otyryp jarnamalaǵan ári ınternet-dúken arqyly veıpterdi ótkizip kelgen. Elektrondy temekini zańsyz satyp, taratty degen kúdikpen 20 jastaǵy azamat polıtsııaǵa jetkizildi.
- Jalpy sany 2,5 myńǵa jýyq veıp tabylyp, tárkilendi. Zańsyz quraldardyń jalpy somasy 18 mln teńge. Qazirgi ýaqytta janbaıtyn temeki ónimderiniń, elektrondyq tutyný júıeleriniń (veıpterdiń), hosh ıistendirgishter men suıyqtyqtardyń aınalymy deregi boıynsha qylmystyq is qozǵaldy, - dep habarlady Pavlodar oblysynyń Polıtsııa departamentinen.
Eske sala keteıik, quramynda nıkotıni bar veıp suıyqtaryn satqan elorda turǵyny sottaldy.