Pavlodarda kúnbaǵys maıyn óndiretin zaýyt salynyp jatyr
Qurylys alańyna Pavlodar oblysynyń ákimi Bolat Baqaýov baryp qaıtty. Maı zaýyty qurylysyn qytaı ınvestorlary qarjylandyrdy. Bıyl olar jobanyń júzege asyrylýyna 1,5 mıllıon AQSh dollaryn bóldi. «Grınland Invest» JShS bas dırektory Chjan ıAn Tsıý myrzanyń aıtýynsha, kásiporyn jyl sońyna deıin iske qosylmaq.
«Shıkizat óndirý qýaty táýligine 300 tonnany quraıdy, jyl saıyn 30 myń tonna maı shyǵarý josparlanyp otyr, - deıdi ol. - Kúnbaǵysty biz Pavlodar oblysynan satyp alamyz, al óndirilgen ónimdi Qytaıǵa jetkizemiz. Kásiporyn iske qosylǵannan keıin shtat 50 adamǵa deıin kóbeıedi. Jumysqa jergilikti turǵyndardy jumyldyramyz degen oı bar».
Kásipkerdi qoldaý maqsatynda memleket qarajaty esebinen kásiporynǵa jalpy somasy 150 mıllıon teńgeni quraıtyn elektr baılanys jelisi tartylyp jatyr. Bolashaqta ınvestorlar aýdany 12 myń sharshy metrdi quraıtyn, qııar men qyzanaq ósirýge arnalǵan jylyjaı salýdy josparlap otyr.
