Pavlodarda Ýsolka eko-parkiniń qurylysy bastalady
PAVLODAR. KAZINFORM — Ertis jáne Ýsolka ózenderiniń aralyǵynda ornalasqan 60 gektar aýmaqta turǵyndardyń demalysy úshin qolaıly jaǵdaılar qurý kózdelip otyr.
Bıyl Pavlodardaǵy Ýsolka shaǵyn aýdanynda eko-parktiń qurylysy bastalady dep kútilýde. Ýsolka ózeniniń jaǵasynda ornalasqan toǵaı arasyn kún jyly mezgilde maskúnemder men qańǵybastar jaılap, únemi kúl-qoqys shashylyp jatatyn. Ekologtardyń dabyl qaǵýymen park jobasy qabyldanyp, endi jurtshylyq onyń tez arada júzege asýyn asyǵa kútip otyr.
— Bıyl oblys ákiminiń tapsyrmasy boıynsha aýqymdy joba — Ýsolka shaǵyn aýdanynda eko-park salý jumystaryn bastaǵaly otyrmyz. Qala boıynsha jumys sapary barysynda eko-park salynatyn aýmaqty tekserip shyqtym. Alda qolǵa alynatyn jumystar týraly baıandamalaryn tyńdadym. Merdigerge qoıylatyn negizgi talap — tabıǵatqa barynsha az áser etý jáne ekologııalyq materıaldardy paıdalaný. Jalpy alǵanda shamamen alpys gektardy quraıtyn aýmaqta qurylys-montaj jumystaryn bastamas buryn, sý basýdyń aldyn alý maqsatynda uzyndyǵy 2,2 km bolatyn dambany nyǵaıtý qajet. Bul jumystarǵa aqpan aıynyń sońǵy onkúndiginde kirisip, Ertis ózeniniń sýy tasyǵanǵa deıin aıaqtaýdy tapsyrdym, — dep habarlady Pavlodar qalasynyń ákimi Hasar Habylbekov.
Belgili bolǵandaı, parkte shamamen 30 gektardaı kógal jabyny, 10 sýlandyrý júıesi bolady. Jaıly oryndyqtar, jaıaý júrginshiler joly, balalarǵa arnalǵan oıyn alańdary, ana men bala bólmesi, dárethana qarastyrylǵan.
Eske sala keteıik, Bıyl Pavlodarda shybyn-shirkeıge qarsy 172 myń gektar alqap óńdeledi.