Pavlodarda kún saıyn úsh myń tonnaǵa jýyq qar shyǵarylýda
PAVLODAR. QazAqparat - Pavlodarda kommýnaldyq qyzmetkerler táýlik boıy shamamen úsh myń tonna qar shyǵarady. Bul jumysqa 120 tehnıka jumyldyrylyp otyr, dep habarlaıdy pavlodarnews.kz .
«Kóktaıǵaqtan keıin qalyń qar tústi», - deıdi Pavlodar qalasy ákiminiń baspasóz hatshysy Saltanat Ákimbekova. - Sondyqtan kúsheıtilgen rejimde jumys isteımiz. Tańerteń kóshelerdi qardan arshýǵa 120 tehnıka shyqty. Onyń ishinde sypyratyn, júk tıeıtin jáne qar shyǵaratyn mashınalar bar. Olar táýlik boıy jumys isteıdi. Sonymen qatar, turǵyn úı-kommýnaldyq sharýashylyǵy bóliminen 200 tehnıka qatarǵa qosylǵan. Aýysym boıynsha kúni boıy joldar tazalanatyn bolady. Kommýnaldyq qyzmet 10 jeltoqsannan bastap qar tazalaýǵa belsendi kirisken. Búginge deıin 16,5 myń tonna qar shyǵaryldy».
