Pavlodarda qulaǵan mektep ǵımaratynyń astynan adamnyń denesi tabyldy

PAVLODAR. KAZINFORM – Oblystyq Tótenshe jaǵdaılar departamentiniń málimetinshe, máıit búgin tańǵy saǵat 4:31-de qırandylardyń astynan tabylǵan.

Qutqarýshylardyń aqparaty boıynsha, kınologtar men qutqarýshylar apattyq-qutqarý jabdyqtary men teplovızordy paıdalanyp, er adamnyń jatqan jerin anyqtaǵan.

- Tańerteń izdestirý jumystaryn júrgizgennen keıin qutqarýshylar máıitti úıindi arasynan taýyp alyp shyqty, - dep qosty Pavlodar oblysy TJD.

Esterińizge sala keteıik, 7 qarashada Pavlodarda salynyp jatqan mektep ǵımaratynyń bir bóligi opyrylyp, birneshe adam zardap shekken.

Shaqyrý keshki saǵat bes shamasynda tústi, sodan keıin dárigerler men qutqarýshylar kelgen.

Úıindiniń astynda 1967 jyly týǵan er adam qalýy múmkin ekeni aıtyldy.

Jaraqat alǵan eki adam aýrýhanaǵa jetkizilgen, tekserýden keıin olar ambýlatorııalyq em alýǵa jiberildi.

Pavlodar oblysynda jolaýshylar avtobýsy aýdarylyp, bir adam qaza tapqanyn jazǵan bolatynbyz.