Pavlodarda qulaǵaly turǵan eski mekteptiń ornyna jańasy salyndy
Pavlodar oblysynyń Moıseevka aýylyndaǵy apatty jaǵdaıdaǵy mekteptiń ornyna jańa bilim ordasy salyndy, dep habarlaıdy QazAqparat oblys ákimdigine silteme jasap.
Maǵjan Jumabaev atyndaǵy jańa bilim oshaǵy Ustazdar kúni qarsańynda esigin aıqara ashty.
Moıseevka aýylyndaǵy tozyǵy jetken jarty ǵasyrlyq ǵımarattyń ornyna zamanaýı bilim berý mekemesi boı kóterdi.
Esterińizge salaıyq, bıyl qysta óńir basshysy Asaıyn Baıhanov Ertis óńiriniń aýyldaryn aralaý kezinde qulaý qaýpi bolǵandyqtan tóbesin bórenemen tirep qoıǵan jergilikti mekteptiń jaı-kúıin kórgen bolatyn.
— Aýyl joıylyp bara jatqan aýyldardyń qataryna jatpaıdy, al, shalǵaıdaǵy aýyl balalary qala balalarymen birdeı jaǵdaıda bilim alýǵa ábden quqyly. Balalardy aýdan ortalyǵyndaǵy mektepke respýblıkalyq jolmen kún saıyn tasymaldaý qaýipti, sondyqtan munda jańa mektep kerek, - degen bolatyn oblys ákimi sol kezde.
Jańa mektepti josparlaý men jobalaýdyń barlyq standartty rásimderin júrgizý eki jylǵa sozylatyn edi, sondyqtan, ǵımaratty ınvestor salyp, sodan keıin daıyn nysan bıýdjet esebinen satyp alynady degen sheshim qabyldanǵan bolatyn.
Bul jumystardy áldeqaıda jyldamdatýǵa, uzaqqa sozylatyn konkýrstyq rásimderdi ótkizbeýge múmkindik berdi.
- 100 oryndyq mektep 4 aıda turǵyzyldy jáne búgin Moıseevka aýylynyń oqýshylary jańa zamanaýı mektepte bilim ala alady. Daıyn nysandy ınvestordan satyp alý týraly sheshimimiz ýaqytty únemdeýge septigin tıgizdi, - dep atap ótti óńir basshysy.
Asaıyn Baıhanov ustazdar men oqýshylardy jańa ǵımaratymen quttyqtady.
Oqý synyptarynan basqa, sport zaly, akt zaly, jabdyqtalǵan ınformatıka, hımııa, fızıka kabınetteri, zamanaýı ınteraktıvti jabdyqtar bar.
Oqý sheberhanalarynyń sany 5-ten 12-ge deıin ulǵaıdy. Aýlada jasandy jabyny bar fýtbol alańy, basketbol alańy, júgirý joly, jylyjaı paıda salyndy.
2024 jyldyń qańtarynan bastap mektep jasyna deıingi balalarǵa arnalǵan shaǵyn ortalyq ashylady.
Aýyl aqsaqaldary mektep salý týraly sheshim qabyldaǵandarǵa rızashylyǵyn bildirdi.
- Alǵysymyz sheksiz - bul óte durys qabyldanǵan sheshim boldy. Eger aýylda mektep bolsa, onda aýyldyń bolashaǵy bar!
