Pavlodarda kúl-qoqys polıgony jumysyn toqtatýy múmkin

PAVLODAR. KAZINFORM — Oblys ortalyǵyndaǵy qatty turmystyq qaldyqtar polıgony endi eki jyldan keıin óz jumysyn toqtatýy múmkin. Buǵan ruqsat qaǵazdarynyń shekti merzimi áser etip otyr. 

«Ekoservıs-PV» JShS basshysy Álıhan Albaqov Pavlodardaǵy kúl-qoqys polıgonynyń 2027 jylǵa deıin ǵana ruqsaty bar ekenin habarlady. Eger ruqsat qaǵazdaryn qaıta qarap, máseleni sheshpese, kúl-qoqysty retteý salasynda úlken másele týyndaýy múmkin.

Óńirlik jer qoınaýyn paıdalaný, qorshaǵan orta jáne sý resýrstary basqarmasynyń basshysy Saǵyn Tóleýtaevtyń aıtýynsha, qazir polıgondy uzartý máselesimen Pavlodar qalasynyń bıligi aınalysyp jatyr. Biraq ol úshin eń áýeli rekýltıvatsııa jobasyn qaıta qaraý qajet. Polıgonda áli de 5-10 jyl qaldyqtardy jınaıtyn oryn bar.

Atap óterligi, oblysta jyl saıyn 300 myń tonnadaı turmystyq qaldyqtar shyǵady. Onyń 100 myń tonnasy qaıta óńdeledi. Mysal úshin plastıkten sypyrǵysh, paketter, qaptar men plastık túıirshikteri shyǵarylady. Qurylys qaldyqtary, kólik shınalary, makýlatýra men akkýmýlıatorlar da óńdeledi.

Eske sala keteıik, elimizde zańsyz polıgondardy joıa almaǵan 10-nan astam ákimniń orynbasary jazalandy.