Pavlodarda qýǵyn-súrginge ushyraǵan sýretshilerdiń 100-ge jýyq týyndysy kórmege qoıyldy
Kórmeni oblystyq kórkemsýret mýzeıi, oblystyq memlekettik muraǵat, P.Vasılev atyndaǵy mýzeı-úıi jáne G.Potanın atyndaǵy oblystyq tarıhı ólketaný mýzeıi birlesip uıymdastyrdy, dep habarlaıdy pavlodarnews.kz .
Pavlodar oblystyq memlekettik muraǵaty basshysynyń orynbasary Hanshaıym Maqajanovanyń aıtýynsha, sharaǵa asharshylyq kezeńde oryn alǵan zulmatty jyldardan naqty málimetter beriletin qujattar qoıylǵan. - Bizde asharshylyq kezine qatysty qujattar jetkilikti. Resmı derekterge súıener bolsaq, 1924 jyly Qazaqstan halqynyń sany alty mıllıonnan astam bolsa, asharshylyq kezinde onyń 1,5 mıllıony opat bolǵan. Al, ult kósemi Álıhan Bókeıhanov keıbir málimetterinde asharshylyq qurbandaryn eki mıllıonǵa jetkizgen. Keıbir tarıhshylar odan da kóp ekenin aıtady. Biraq Pavlodar óńirinde naqty qansha adam zardap shekkeni týraly málimet joq. Sebebi ashtyqtan qyrylǵandardyń sanyn shyǵarý múmkin emes. Adamdar ártúrli jerde ıaǵnı, qalalyq jerde, aýyldyq eldi mekende, tipti, bir jerden ekinshi jerge kóship bara jatqan jolda qatyp qalǵan. Sol kezdegi bılik ókilderi qaza bolǵan adamdardy jınap úlgermegen. Sońǵy málimetter boıynsha Pavlodar oblysynda asharshylyq qurbandary jerlengen 37 zırat bar ekeni anyqtalǵan, - deıdi Hanshaıym Maqajanova. Oblystyq kórkemsýret mýzeıiniń dırektory Aıgúl Nurǵamısovanyń sózinshe, kórmege kezinde Qazaqstanǵa jer aýdarylǵan 16 avtordyń shyǵarmasy usynylǵan. - Búgingi kórmege totalıtarlyq tártip jyldarynda saıası qýǵyn-súrginge ushyrap, jer aýdarylǵan sýretshilerdiń týyndylaryn qoıyp otyrmyz. Máselen, Abram Cherkasskıı, Lenonıd Brıýmmer, Elızaveta Govorova, Isaak Itkınd, Vladımır Eıfert syndy azamattarǵa kezinde ártúrli aıyp taǵylyp, jer aýdarylǵan nemese keıbireýi jazyqsyz qamaýǵa alynǵan. Kórmeni maýsym aıynyń 20-syna deıin tamashalaýǵa bolady. Saıası qýǵyn-súrgin jyldary týraly málimet alamyn deýshilerge esigimiz ashyq, - deıdi Aıgúl Nurǵamısova.
Aıta keterligi, kórmege HH ǵasyrdyń 30-shy jáne 80-shi jyldary aralyǵynda salynǵan jumystar tańdalyp alynǵan. Búginde mýzeı qorynda jalpy saıası qýǵyn-súrginge ushyraǵan sýretshilerdiń 214 shyǵarmasy saqtaýly tur.
