Pavlodarda qýattylyǵy 37 myń tonna elevator iske qosyldy
ASTANA. QazAqparat - Lenın kentinde ornalasqan jańa bıdaı qoımasynda bıdaıdyń sapasyn anyqtaý úshin tolyq jabdyqtalǵan óndiristik-tehnologııalyq zerthana qarastyrylǵan, dep habarlaıdy pavlodarnews.kz.
Elevatordyń ashylýyna oblys ákimi Bolat Baqaýov qatysty. Aımaq basshysy kásiporynda barlyq protsess avtomattandyrylǵanyn atap ótti. Tehnologııalyq jabdyqtaýǵa keletin bolsaq, bıdaı saqtaý ornynda keptirgish, jeldetkish jáne bıdaıdy saqtaý syıymdylyǵy, kóterý kólik tehnıkasy jáne taǵy basqalary bar.
Bul jerde syrttan ákelinetin jáne saqtaýda turǵan bıdaıdyń sapasyn anyqtaıtyn zerthana istep tur.
« Biz lıtsenzııa alyp, eń bilikti mamandardy jaldadyq. Olardyń bul saladaǵy tájirıbesi mol. Zańdy tulǵalarmen birge jeke kásipkerlerge de qyzmet kórsetemiz, - deıdi «GROUP KSM» JShS dırektory Bekzat Umutshaqov.
Eki jyl boıy júzege asyrylyp kele jatqan jobanyń quny 1,5 mıllıard teńgeni quraıdy. Kásiporyndy iske qosýdyń nátıjesinde 45 adam jumyspen qamtyldy. Kompanııa basshylyǵy bolashaqta qaraqumyq jáne arpa óndiretin zaýyt ashýdy kózdep otyr.
«Jarma shyǵarý óte tıimdi. Sebebi, bul ónimniń basym bóligi eksportqa ketedi. Eger de siz satyp alatyn bolsańyz, sharýalardy arpa, suly, tary ósirýge baǵyttaı alamyz», - dedi oblys ákimi.
Óńirde qýattylyǵy 264 myń tonnany quraıtyn alty lıtsenzııasy bar elevator jumys isteıdi. Búgingi tańda bıdaı saqtaý qoımalaryna 136 myń tonna bıdaı jetkizilgen.
