Pavlodarda qýańshylyqtyń aldyn alý úshin jemshóp daıyndaý jospary ázirlendi

PAVLODAR. QazAqparat - Qazaqstannyń jekelegen aımaqtaryndaǵy qatty qurǵaqshylyqqa baılanysty Pavlodar oblysynda mal qystatýdyń ártúrli stsenarıılerine daıyndyq júrgizý jóninde sheshim qabyldandy.

Aldyn ala qamdaný sharalary aıasynda 60 myń tonna jemdik astyq satyp alý, shóp shabýǵa arnaıy sýbsıdııalanǵan janarmaı bólý jáne jınalǵan astyqtan qalatyn sabandy rezervke alý josparlanyp otyr.

Mal azyǵyn daıyndaý jaǵdaıy oblys ákimdiginde ótken keńes otyrysynda talqylandy.

Pavlodar oblysyndaǵy jaǵdaı elimizdiń basqa aımaqtarynda qalyptasqan jaǵdaılarǵa qaraǵanda turaqty dep baǵalanyp otyr.

Alaıda, aımaqta aýa raıynyń qyńyrlyǵyna táýeldi bolyp qalmaı, qaýipsizdik sharalaryn aldyn ala oılastyrý týraly sheshim qabyldandy.

Búgingi kúni Pavlodar oblysyndaǵy jemshópke degen qajettilik 1,1 mln tonnany quraıdy.

Jergilikti aýylsharýashylyq taýar óndirýshiler shóp shabý naýqanyn bastap, 56 myń tonna shóp daıyndady.

Biraq oblysta jemshóp daqyldary men shópterdiń ortasha shyǵymdylyǵy gektaryna 4,3 tsentner mólsherinde bolsa, aımaqtyń keıbir aýdandarynda bul kórsetkish áldeqaıda tómen – gektardan 2-den 2,7 tsentnerge deıin jemshóp alynady.

- Qolaısyz klımattyq jaǵdaı týyndaı qalsa, onyń jaǵymsyz saldary týyndaýy múmkin, - dedi aýyl sharýashylyǵy basqarmasynyń basshysy Nurbolat Maqashev. - Biz ár túrli jaǵdaılarǵa sáıkes áreket etý algorıtmderin daıyndadyq. Birinshi stsenarıı boıynsha, mal azyǵyn daıyndaý kórsetkishi 25%-ǵa tómendese, jemshóp tapshylyǵy 285 myń tonnany quraıdy. Mundaı jaǵdaıda bizge 45 myń tonna jemdik astyq qajet bolady. Ekinshi jaǵdaı – qajetti jem-shóp kóleminiń tek 50% jınalsa, shóp jetispeýshiligi 570 myń tonnaǵa jetpek. Bul jaǵdaıda 60 myń tonna jem astyq qajet bolmaq.

Jemshóptiń qajetti mólsherin rezervke alý úshin astyq egetin aımaqtar forvardtyq kelisimshart boıynsha jınalǵan arpanyń belgili bir bóligin «Azyq-túlik kelisim shart korporatsııasy» UK» AQ-na tapsyrady.

Osydan keıin ulttyq astyq satyp alý operatory jemdik astyqty Pavlodar oblysyndaǵy elevatorlardyń birine ornalastyrady.

Qajettilik týyndaıtyn bolsa, mal azyǵy fermalar men jeke qosalqy sharýashylyqtarǵa belgilengen baǵamen jetkiziledi.

Qolǵa alynǵan qoldaý sharalarynyń taǵy biri – arzan dızel janarmaıymen qamtamasyz etý. Bul másele aýyl sharýashylyǵy mınıstrligimen birlese otyryp sheshildi. Osy shilde aıynda aımaqtaǵy egistik alqaptaryna janarmaı jeńildetilgen baǵamen jetkizile bastaıdy. Onyń quny lıtrine 165 teńgeni quraıdy – bul naryqtaǵy baǵadan 25% -ǵa tómen.

- Bul janarmaı esh kidirissiz jetkizilip turýy tıis, - dep tapsyrdy Pavlodar oblysynyń ákimi Ábilqaıyr Sqaqov. - Sonymen qatar, arzandatylǵan janar-jaǵarmaıdyń maqsatty paıdalanylýyn qadaǵalaý qajet. Tómendetilgen baǵamen jetkiziletin janarmaıdyń kólemi tutastaı tek jemshóp qoryn qurýǵa jumsalýy kerek.

Arnaıy Jol kartasynda jemshóp daıyndaý boıynsha basqa da sharalar qarastyrylǵan.

Onyń ishinde paıdalanbaı kelgen jerlerdi shabyndyqqa bólý, jınalǵan astyqtan qalǵan sabandy daıyndaý, turǵyndar úshin orman sharýashylyqtary men rezervattar aýmaqtarynda jemshóp daıyndaý múmkindigin qamtamasyz etý.

Bul naýqandy aımaq basshysynyń orynbasary Asaıyn Baıhanov basqaratyn arnaıy qurylǵan aımaqtyq shtab baqylamaq.

Pavlodar oblysynyń ákimi jergilikti basshylarǵa qajetti jemshóp qoryn jınap qana qoımaı, ony saqtaý kerektigi jóninde eskertti.

Sonymen qatar, Ábilqaıyr Sqaqov shóp baǵasyn muqııat qadaǵalap, naryqtaǵy alypsatarlyqqa jol bermeý sharalaryn qolǵa alýdy tapsyrdy.