Pavlodarda KSRO tólqujatymen júrgen 40-tan astam adam anyqtaldy
PAVLODAR. KAZINFORM — Ótken jyly polıtseıler 80-nen astam qujatsyz adamdy anyqtasa, olardyń jartysy jaramdylyǵy áldeqashan ótip ketken 1974 jylǵy úlgidegi KSRO tólqujatyn ıemdenip kelgen.
Pavlodarda KSRO tólqujatymen júrgender áli de barshylyq. Óńirlik polıtsııa departamenti kóshi-qon qyzmetiniń basqarmasy azamattyq jáne ımmıgratsııalyq tobynyń erekshe tapsyrmalar jónindegi aǵa ınspektory, polıtsııa maıory Almıra Haırýllınanyń aıtýynsha, álgindeı azamattardyń kóbi oblys ortalyǵynda turady.
— Qujaty joq nemese jaramdylyq merzimi ótip ketken tulǵalardyń kóbi bul — 1974 jylǵy KSRO tólqujatymen júrgender nemese kezinde qujatyn joǵaltyp alyp, qalpyna keltirmegender. Zańdyq turǵydan alǵanda olar Qazaqstan Respýblıkasynyń azamaty ekenin dáleldeı alýy kerek, bolmaǵan jaǵdaıda azamattyǵy joq tulǵa dep esepteledi. Adamdar kóp jaǵdaıda shalǵaı aýyldarda turyp, qujatyn jańartýǵa mán bermeıdi. Endi biri túzeý mekemelerinde jazasyn uzaq jyldar ótep shyqqan soń eski qujatyn aýystyrmaı júre beredi. Negizgi sebep — azamattardyń qujat máselesine salaq qarap, ýaqytynda resimdeýge nıet tanytpaýy, — dep túsindirdi bul jaǵdaıdyń sebebin Almıra Ábdikárimqyzy Kazinform tilshisine.
Mıgratsııa qyzmetiniń mamandary qujatsyz júrgenderdi anyqtaýǵa baǵyttalǵan is-sharalardy turaqty júrgizip keledi. Ótken jyly atqarylǵan júıeli jumystar 80-nen astam adam jeke bas kýáliginsiz júrgenin anyqtap berdi. Olardyń 41-i osydan jarty ǵasyr buryn alǵan KSRO tólqujatymen ómir súrip kelgen. Nátıjesinde 74 adam QR azamaty dep tanylyp, tıisti qujatpen qamtamasyz etilgen. Taǵy 7 adamnyń azamattyǵy dáleldenbegeni sebepti olarǵa azamattyǵy joq tulǵa kýáligi berilgen.
— «Adam quqyqtary jáne zańdylyqtyń saqtalýy jónindegi Qazaqstan halyqaralyq bıýrosy» men ózge de úkimettik emes uıymdarmen bul baǵytta turaqty baılanystamyz. Jyl basynan beri taǵy 6 azamat anyqtalyp, kazirgi tańda qujattar tizilimi jınaqtalyp jatyr. Tekseris materıaldary tolyqqandy bolǵannan keıin zańnamaǵa sáıkes sheshim qabyldanyp, qujattaný máselesi sheshiledi. Qalada áleýmettendirý ortalyqtary shoǵyrlanǵandyqtan mundaı azamattar Pavlodar qalasynda kóp kezdesedi, — deıdi Almıra Haırýllına.
Eske sala keteıik, AQSh azamattyǵyn qabyldaǵan pavlodarlyq 800 myń teńge aıyppul tóledi.