Pavlodarda qoshtasý hatyn jazyp, úıinen ketip qalǵan jigit bir aptadan keıin tabyldy

PAVLODAR. KAZINFORM - 29 jasar er adam úıden keterinde áleýmettik jelidegi barlyq paraqshalaryn óshirip, týysqandaryna qoshtasý hatyn jazyp ketken. Ony izdeýge polıtsııa men VITA eriktiler jasaǵy jumyldyryldy.

Bul týraly eń áýeli VITA eriktileri habarlady. 

«Azamat Baqytuly Ismýrzınov 13 naýryz kúni úıinen shyǵyp ketkennen oralmaǵan. 1995 jyly týǵan, boıy 170 sm, aryqshalaý kelgen, shashy qara tústi, kózildirik taǵady. Ústinde jasyl tústi kúrteshesi, aıaǵynda ashyq qońyr tústi báteńke bolǵan. Azamattyń dostary ol árdaıym kúlimsirep júretin, aqyldy jigit, biraq boıynda bir qupııany ustap júretindeı kórinetin edi deıdi. Azamatty Pavlodar qalalyq Ońtústik polıtsııa bóliminiń qyzmetkerleri izdep tapty» dep málimdedi VITA jasaǵynyń ókilderi.

Keshe jigittiń anasy beıneúndeý jasap, ulynyń úıge qaıtýyn ótingen.

Sol habarlama áser etti me eken, búgin tabylǵany habarlandy.