Pavlodarda kóshedegi ystyq sý qubyry jarylyp, er adam kúıip qaldy
PAVLODAR. KAZINFORM — Jer astyndaǵy ystyq sý qubyry aıaq astynan atylyp, paıda bolǵan shuńqyrǵa 35 jastaǵy er adam túsip ketken.
Oqys oqıǵa ornynan túsirilgen beınejazba áleýmettik jelide tarady. Beınejazba avtory — zardap shekken azamattyń qaryndasynyń aıtýynsha, ol kúndelikti adamdar júretin trotýarmen beıqam kele jatqanda aıaq astyndaǵy jer oıylyp, ystyq sý toly shuńqyrǵa qulaǵan.
Pavlodar oblystyq densaýlyq saqtaý basqarmasy bul aqparatty rastady.
— 35 jastaǵy azamattyń eki sıraǵyn 2-3 dárejeli termııalyq kúıik shalǵan. Naýqas Pavlodar № 1 qalalyq aýrýhanasynyń kúıik bólimshesine jatqyzyldy. Jalpy tániniń 7%-y kúıgen. Qazirgi ýaqytta jaǵdaıy ortasha aýyr dep baǵalanyp otyr, — dep habarlady vedomstvonyń baspasóz qyzmetinen.
Zardap shekken taraptyń jaqyndary oqıǵa boıynsha jan-jaqty tekserý júrgizip, kináli tulǵalardy jaýapqa tartýdy talap etip otyr.
Óz kezeginde «Pavlodar jylý jelileri» JShS ókilderi atalǵan ýchaskede qubyr zaqymdanyp, jedel apattyq toptyń oqıǵa ornyna shyqqanyn málimdedi. Kompanııa tarapynan tıisti jóndeý-qalpyna keltirý sharalary qolǵa alynyp jatyr.
Eske sala keteıik, Pavlodarda sómkedegi Power Bank jarylyp, boıjetkendi kúıik shaldy.
