Pavlodarda kóshe jarnamasynan qate tapqandar marapattaldy
PAVLODAR. QazAqparat - Pavlodarda kóshedegi jarnama mátinderinen qatelerdi tabýǵa arnalǵan «Qala kelbeti» aktsııasy ótti, dep habarlaıdy QazAqparat pavlodarnews.kz saıtyna silteme jasap.
Aktsııany Pavlodar oblystyq Tilderdi damytý basqarmasy ótkizdi. Oǵan 140-tan astam foto kelip túsken.
«Sharanyń negizgi maqsaty oblys kóshelerindegi jarnama mátinderin ornalastyrýda «Til týraly» QR Zańy talaptarynyń saqtalýyna monıtorıng júrgizý, oblys turǵyndarynyń belsendiligin arttyrý boldy. Aktsııaǵa oblystyń kez kelgen azamaty qatysyp, 2019 jylǵy 1-20 naýryz aralyǵynda qala kóshelerinde ornalasqan resimdelýi zańnamalarǵa sáıkes kelmeıtin nemese qateleri bar jarnama ónimderin fotosýretke túsirip, basqarmaǵa usyndy», - dedi basqarmanyń monıtorıng jáne taldaý bóliminiń basshysy Samat Kýshmaǵulov.
Sharanyń qorytyndysy boıynsha belsendi 5 qatysýshyǵa basqarmanyń alǵys hattary jáne yntalandyrý syılyqtary tabys etildi.
Aktsııa boıynsha eń kóp foto jibergen (47 foto) S.Toraıǵyrov atyndaǵy PMÝ stýdenti Dosjan Muratbek.
Samat Kýshmaǵulov qate jibergen mekeme basshylarymen túsindirme jumystaryn júrgizetinin aıtty.
«Qate jarnama ıelerine zań úzindilerin taratamyz. Qatelerdiń kóbisi n-ń, k-q áripterinen ketken. Buryn qate jarnama jasaǵandar qatesin túzetýge mindetti bolatyn. Bul zań 2018 jyly mamyr aıynan bastap alynyp tastaldy. Qazir biz tek keńes, nusqaý beremiz. Degenmen, kópshiligi aýystyrady», - dedi bólim basshysy.
Aıta keteıik, aktsııa 4-5 jyldyń kóleminde dástúrli túrde jylyna bir ret ótkizilip keledi. Alǵashqy jyldary 400 foto túsken. Keıin 300, 200 bolyp, jyl saıyn azaıyp keledi. Ótken 2018 jyly jarnama qateleri boıynsha 200-ge jýyq foto túsken bolsa, onyń 80-90 paıyzy túzetilgen.
