Pavlodarda kóshi-qon zańnamasyn buzǵan 100-ge jýyq sheteldik el aýmaǵynan shyǵaryldy
PAVLODAR. KAZINFORM — Ertis-Baıan óńirinde jyl basynan beri kóshi-qon zańnamasyn buzǵany úshin 6 279 adam ákimshilik jaýapkershilikke tartylǵan. Olardyń 1 504-i — shetel azamattary.
Aımaqta sheteldikterdiń qatysýmen birqatar zań buzýshylyqtar anyqtalǵan.
— Toǵyz aıdyń qorytyndysy boıynsha sot sheshimimen 99 shetel azamaty Qazaqstan aýmaǵynan ákimshilik tártippen shyǵarylǵan. Sondaı-aq sheteldik jumys kúshin tartý jáne paıdalaný qaǵıdalaryn buzǵany úshin 119 jumys berýshi jaýapkershilikke tartyldy, — dep habarlady óńirlik polıtsııa departamentinen.
Departament málimetinshe, kóshi-qon qyzmetiniń qyzmetkerleri zań buzýshylyqtardy anyqtaý maqsatynda turaqty túrde nysanaly tekserýler men reıdtik is-sharalar júrgizip keledi.
Budan bólek, jyl basynan beri 595 shetel azamaty Qazaqstan Respýblıkasynyń azamattyǵyn alǵan. Al Pavlodar oblysynyń 254 turǵynyna shetelge turaqty turýǵa ketýge ruqsat berilgen. Olardyń 94-i alys shetel memleketterine, 160-y Táýelsiz Memleketter Dostastyǵy elderine qonys aýdarýǵa nıetti.
Eske sala keteıik, SQO-da zańsyz júrgen 120 sheteldik reıd kezinde ustaldy.
Sondaı-aq sheteldikterge jeke sáıkestendirý nómirin berý qaǵıdalary ózgergeni týraly jazǵanbyz.
