Pavlodarda qorshaǵan ortaǵa zııandy zattardyń mólsheri azaıyp keledi

PAVLODAR. KAZINFORM - Oblysta qorshaǵan ortany lastaıtyn zattardyń negizgi úlesi Ekibastuz (46,2%), Pavlodar (24,7%) jáne Aqsý (21,9%) qalalaryna tıesili. Jyldyń alǵashqy jartysynda qorshaǵan ortaǵa tastalatyn zııandy zattardyń naqty kólemi 349,9 myń tonnany quraǵan.

Pavlodar oblysynda jyl basynan beri qorshaǵan ortaǵa shyǵarylatyn zııandy zattardyń úlesi sál de bolsa tómendep kele jatqany baıqalady. Bul rette atmosferalyq aýaǵa taraıtyn zııandy shyǵaryndylardyń negizgi bóligin Ekibastuz qalasy ıelenip otyr (46,2%). Al Pavlodar (24,7%) jáne Aqsý (21,9%) qalalarynda bul kórsetkish kómirli shaharmen salystyrǵanda eki esege jýyq kem.

- 2024 jyldyń alǵashqy jartysynda qorshaǵan ortaǵa tastalatyn zııandy zattardyń naqty kólemi 349,9 myń tonnany qurady. Bul ótken jyldyń salystyrmaly kezeńimen salystyrǵanda 0,75 myń tonnaǵa (0,2%) az. Al jyldyq lımıt 923,9 myń tonna deńgeıinde qalyp otyr. Bul nátıjeler oblystaǵy ekologııalyq jaǵdaıdyń jaqsarýy men kásiporyndardyń ekologııalyq jaýapkershiligin jáne turaqty damýǵa tyrysýyn dáleldeıdi, - deıdi óńirlik ekologııa departamentiniń basshysy Qanat Musaparbekov.

Shyǵaryndylar negizinen «Qazaqstan elektrolız zaýyty» AQ, «2-MAES Ekibastuz stantsııasy» AQ, «Pavlodar munaı-hımııa zaýyty» JShS, «Pavlodarenergo» AQ, «Eýroazıattyq energetıkalyq korporatsııasy» AQ kásiporyndarynda tirkelgen.

Ekologııa departamenti qorshaǵan ortanyń sapasyn jaqsartyp, ekologııalyq turaqty jaǵdaıdy saqtaý úshin monıtorıngtar júrgizip turady. Jyl basynan 69 zań buzýshylyq anyqtalyp, olardy joıý týraly 30 uıǵarym shyqqan. Jalpy somasy 20,5 mln teńge aıyppul óndirilgen.

Eske sala keteıik, pavlodarlyq kásiporyn ekologııalyq talaptardy buzǵany úshin iri kólemde aıyppul tóledi.