Pavlodarda koronavırýstan jazylǵan azamatpen baılanysta bolǵan 154 adam baqylaýdan bosatyldy
«9 sáýir kúni koronavırýs ınfektsııasyn juqtyrǵan taǵy 2 adam tirkeldi. Ókinishke qaraı, bireýi kóz jumdy. Qaıtys bolǵan kisi 1936 jyly týǵan. Pavlodar turǵyny. Ol 8 sáýirde aýrýhanaǵa túsken. Sol kúni er adamnan koronavırýs boıynsha test alynǵan edi. Kelesi kúni onyń koronavırýsty juqtyryp alǵany belgili boldy. Er adam bronha demikpesimen, ókpeniń sozylmaly aýrýy, júrektiń ıshemııalyq aýrýymen, úshinshi dárejeli arterııalyq gıpertenzııamen jáne kókirek terisiniń qaterli isigi dıagnozdarymen esepte turǵan», - dedi Birjan Dosmaıylov Pavlodar qalasynda onlaın rejimde ótken óńirlik kommýnıkatsııalar qyzmetiniń baspasóz máslıhatynda.
Onyń aıtýynsha, kóz jumǵan qarııamen baılanysta bolǵan 118 adamnyń 50-i aýrýhanaǵa jatqyzylyp, 65-ne úı karantıni tártibi mindettelgen.
«Ekinshi naýqas – 1981 jylǵy Pavlodar turǵyny. 8 sáýirde KVI belgilerimen juqpaly aýrýlar emhanasyna jedel járdemmen jetkizilip, jatqyzyldy. Qazirgi kezde onyń jaǵdaıy turaqty. Emdelýshiniń aıtýynsha ol 21 naýryzdan bastap Qazaqstannyń birneshe qalasynda, sonyń ishinde Qaraǵandy, Shymkent, Taraz qalalaryna barǵan. Onymen baılanysta bolǵan 158 adam anyqtaldy. Olardyń 6-y statsıonarlyq karantınge jatqyzylyp, 24 adam úı karantınin saqtaýǵa mindetteldi. 38 adam basqa óńirlerdiń turǵyndary. Olar týraly málimet oblystardyń tıisti mekemelerine jiberildi», - dedi ol.
Birjan Dosmaıylov keshe Pavlodar oblysynda bir adamnyń KVI-dan emdelip shyqqanyn da eske saldy.
«1988 jylǵy Aqsý qalasynyń turǵyny emdelý kýrsynan ótip, jazylǵannan keıin turaqty mekenjaıy boıynsha úı karantınine jiberildi. Onymen baılanystaǵy 154 adamnyń bári baqylaýdan bosatyldy», - dedi ol.
Eske sala ketsek Pavlodar oblysynda koronavırýs indetinen bir adam kóz jumǵany keshe habarlanǵan bolatyn. Ol 1936 jyly dúnıege kelgen.