Pavlodarda koronavırýstan kóz jumǵan naýqas týberkýlezge qarsy dıspanserde esepte turǵan
PAVLODAR. QazAqparat – Pavlodarda koronavırýs indetinen 58 jastaǵy er adam qaıtys boldy, dep habarlaıdy QazAqparat.
«Koronovırýs ınfektsııasy Pavlodardyń 1962 jylǵy azamatynan anyqtalyp, rastalǵan. Ol ftızıatr dárigerdiń dıspanserlik esebinde turǵan», - dep habarlady Pavlodar oblysy ákimdiginiń baspasóz qyzmetinen.
Er adam oblystyq týberkýlezge qarsy dıspanserde turaqty túrde statsıonarlyq em qabyldap, turǵylyqty mekenjaıynda ambýlatorlyq em alǵan. 29 mamyr kúni ol ftızıatr dárigerge kelip, ózin nashar sezingenin aıtyp, demikpe, qaqyryq túsetin jótel, oń jaqtaǵy jaýyrynynda aýyrsyný paıda bolǵanyna shaǵym bildirdi. Odan COVID-19 indetin anyqtaý maqsatymen taldaý alyndy.
«Er adamnyń jaǵdaıynyń nasharlaýyna baılanysty ol oblystyq týberkýlezge qarsy dıspanserdiń terapııa bólimine joldandy», - dep qosyp ótti ákimdikten.
3 maýsymda COVID-19 indetin anyqtaý úshin alynǵan taldaý qorytyndysy oń bolyp shyqty. Er adam birden ınfektsııalyq statsıonardyń jansaqtaý bólimine jetkizilip, jaǵdaıynyń nasharlaýyna baılanysty ókpeni jasandy jeldetý apparatyna qosyldy.
«Patsıentke barlyq qajetti medıtsınalyq kómek kórsetildi, tıisti mamandardyń keńesi uıymdastyryldy, sondaı-aq Nur-Sultan qalasy Ulttyq shuǵyl medıtsınany úılestirý ortalyǵynyń sarapshylar tobymen kúndelikti konsılıým ótkizilip turdy. Emdeý bekitilgen standarttar, aýrýlar dıagnostıkasy men emdeý standarttaryna sáıkes júrgizildi. Qarqyndy terapııanyń júrgizilýine qaramastan patsıent 9 maýsym kúni saǵat 08:00-de qaıtys boldy», - dep rastady óńirlik ákimdikten.
Ólimmen aıaqtalatyn jaǵdaılardy zertteý komıssııasynyń sheshimimen er adam koronavırýs ınfektsııasynan qaıtys bolǵan dep tirkeldi.
«Marqumnyń týystary men jaqyndaryna qaıǵyryp, kóńil aıtamyz» delingen habarlamada.
Eske sala keteıik, keshe Túrkistan jáne Pavlodar oblystarynda koronavırýstan 3 naýqas kóz jumǵanyn habarlaǵan bolatynbyz.
