Pavlodarda koronavırýspen kúreske aýyl dárigerleri men JOO túlekteri tartylady

PAVLODAR. QazAqparat - COVID-19 ınfektsııasyna qarsy sharalardy úılestirý jónindegi jedel shtabtyń statsıonarlardy medıtsına kadrlarymen qamtamasyz etý boıynsha onlaın otyrysy ótti, dep habarlaıdy pavlodarnews.kz.

Jedel shtabtyń baspasóz ortalyǵynyń málimdeýinshe, qala jáne aýdan ákimderi provızor patsıentterimen jumys isteý úshin oblys ortalyǵyna barýǵa daıyn burynǵy medıtsına qyzmetkerleri men joǵary medıtsınalyq oqý oryndarynyń túlekteri arasynda kadrlardy belsendi izdestirýde.

Oblys ákimi Ábilqaıyr Sqaqov buǵan deıin provızorlyq aýrýhanalarda jumys isteıtin medıtsına kadrlaryn izdeýdi kúsheıtýdi tapsyrǵan bolatyn. Búgin ol qala jáne aýdan ákimderiniń osy baǵyttaǵy jumys barysy týraly esebin tyńdady.

- 60-qa jýyq adam, onyń úshten biri - medıtsınalyq bilimi barlar, buqaralyq aqparat quraldarynda, áleýmettik jelilerde jáne ınternet-resýrstarda jarııalanǵan habarlandyrýǵa jaýap berdi. Sonymen qatar, bilim uıymdarymen, jeke medıtsınalyq uıymdarmen jáne basqalarmen jumys isteýdemiz, - dedi Pavlodar qalasynyń ákimi Qaırat Núkenov. - Densaýlyq saqtaý basqarmasymen tyǵyz baılanystamyz, barlyq málimetterdi taratyp otyrmyz.

Oblystyń túkpir-túkpirinen medıtsına salasynyń burynǵy qyzmetkerleri men medıtsınalyq joǵary oqý oryndarynyń túlekteri jumyldyrylýda. Jaqyn kúnderi 20-dan astam adam aýdandardan Pavlodarǵa attanady. Óńir basshysy mamandardy izdeýdi jalǵastyryp, aýrýhanalarda jumys isteýge nıetti mamandarǵa aqy tóleý jáne áleýmettik tólemder máselesi boıynsha túsindirý jumystaryn kúsheıtýdi tapsyrdy.

Ótken táýlikte oblystyń provızorlyq aýrýhanalaryna 367 adam tústi, 231 adam shyǵaryldy. Aýrýhanaǵa jatqyzylǵandardyń kópshiligi Pavlodardan - 276 patsıent.