Pavlodarda koronavırýs juqtyrǵan 11 naýqastyń jaǵdaıy aýyr
Ótken táýlikte Pavlodar oblysynda koronavırýs juqtyrǵan 106 adam tirkeldi. Bir naýqastyń oqshaýlanǵanǵa deıingi juqtyrý koeffıtsenti (RT) - 1,09. Tósek-oryn júktemesi – 22,91%.
Densaýlyq saqtaý basqarmasynyń basshysy Aıdar Seıitqazınovtyń habarlaýynsha, oblysta COVID-19 dıagnozy boıynsha emdelip jatqan 11 naýqastyń jaǵdaıy aýyr, onyń úsheýi ókpeni jasandy jeldetý apparatyna qosylǵan.
Sonymen qatar, Aıdar Seıitqazınov KVI jáne pnevmonııadan ambýlatorlyq em alyp júrgen naýqastardy emdeý barysy týraly aqparat berdi.
Onyń aıtýynsha, dárigerler men úıde emdelip jatqan patsıentter arasynda ornatylǵan beınebaılanys tıimdiligin dáleldep otyr.
Oblys ákimi Ábilqaıyr Sqaqov beınebaılanys ádisin jalǵastyrýdy jáne jetildirýdi tapsyrdy.
Sonymen qatar óńir basshysy dıspanserlik esepte turǵan patsıentterge erekshe nazar aýdarý qajettigin atap ótti.
- Dárigerler basqa aýrýy bar naýqastarǵa erekshe nazar aýdarýy tıis – ár emhana turǵysynan olar kóp emes. Ambýlatorlyq em alyp jatqan patsıenttiń jaǵdaıy nasharlaıtyn bolsa, sáıkesinshe sol emhananyń búkil jumysyna tómen baǵa beriledi, - dedi ákim.
Shtab otyrysynda Respýblıkalyq elektrondyq densaýlyq saqtaý ortalyǵynyń ókilderi oblystaǵy epıdemıologııalyq jaǵdaıǵa baǵa berdi.
Ortalyq bóliminiń meńgerýshisi Irına Nagornaıanyń aıtýynsha, tumaý men JRVI órship turǵanda epıdemıologııalyq jaǵdaıdyń jaqsarýy ekitalaı.
Olar júrgizgen saraptama qazir Pavlodar oblysynda jaǵdaı turaqty ekenin kórsetip otyr.
- 1 jeltoqsanda alynǵan aqparat boıynsha ınfektsııalyq naýqastarǵa arnalǵan tósek-orynnyń 34% jáne karantın tóseginiń 3% paıdalanylyp jatyr. Densaýlyq saqtaý júıesiniń de júktemesi osyǵan sáıkes. Degenmen saq bolý kerek, sýyqpen birge tumaý men JRVI-dyń da kúsheıýi ábden múmkin, - deıdi Irına Nagornaıa.
Jedel shtab otyrysy kezinde oblys ákimi KVI juqtyrǵan naýqastarmen baılanysta bolǵan adamdardyń sanıtarlyq talapty saqtaýyn baqylaýdy kúsheıtýdi tapsyrdy.
Sonymen qatar, Ábilqaıyr Sqaqov monıtorıng toptarynyń shaǵyn jáne orta bıznes sýbektilerine qatysty amaldary eskertý sıpatynda bolýy tıis ekenin eskerti.