Pavlodarda koreı kınosynyń festıvali ótti
PAVLODAR. QazAqparat - Sh. Aımanov atyndaǵy kınoteatrda Qazaqstandaǵy Koreı elshiligi koreı mádenı ortalyǵynyń uıymdastyrýymen festıval ótti, dep habarlaıdy pavlodarnews.kz.
Qazirgi tańda álemniń 27 memleketinde 32 koreı ortalyǵy jumys isteıdi. Astanada osyndaı ortalyq 2010 jyly qazaqstandyqtardy koreı mádenıetimen tanystyrý jáne memleket arasyndaǵy mádenıet salasynda tájirıbe almasý maqsatynda ashylǵan.
Ortalyq dırektory Lı He-rannyń aıtýynsha, Qazaqstanda koreı kınosynyń festıvali bıyl elimizdiń toǵyz qalasynda uıymdastyrylyp, Pavlodarda aıaqtalǵan. Tegin festıvalge stýdentter men Qazaqstan halqy assambleıasynyń ókilderi, jaqsy kınony baǵalaı biletin adamdar jınaldy.
« Qazaqstandyqtar komedııa jáne drama janryn unatady dep estidik. Sondyqtan kórsetilimge «Meniń áıelim - meniń qalyńdyǵym» komedııasy men «Arýlar baıqaýynyń jeńimpazy» dramasyn tańdap aldyq. Bul fılmder koreı tilinde bolsa da oryssha sýbtıtrmen usynyldy», - deıdi ortalyq dırektory.
Koreı ortalyǵy Astanada kınofestıvalden basqa, túrli mádenı sharalar ótkizedi. Onyń ishinde kontsertter men foto jáne órnekter kórmesi bar. Sol jerde arnaıy kýrstarda koreı tili men koreı taǵamdaryn daıyndaýdy úırenýge bolady.
«Qazaqstan Koreıa úshin Ortalyq Azııadaǵy mańyzdy seriktes bolyp tabylady. Koreıler 80 jyl boıy Qazaqstannyń jerinde ómir súredi. Qazaqstan elimen baılanys dıplomatııa, mádenıet jáne basqa da baǵyttarda damı túsedi degen senimdemiz», - deıdi Lı He-ran.
