Pavlodarda kópqabatty úıdiń aýlasynda er adamdy atyp óltirgen kúdikti izdestirilýde
NUR-SULTAN. QazAqparat – Pavlodarda belgisiz bireý kópqabatty úıdiń aýlasynda er adamdy atyp óltirgen. Bul oqıǵa týraly aqparat áleýmettik jelilerde jarııa etildi, dep habarlaıdy pavlodarnews.kz.
Jeksenbi kúni @kolesa_pavlodara jáne @tipavlo.dar pablıkteri qaıǵyly oqıǵa bolǵan orynnyń fotosýretterin óz paraqshalarynda jarııa etti. Polıtsııa atalmysh faktini rastaǵanymen, ázirshe oqıǵanyń mán-jaılary týraly aqparat taratpaýda.
Tekserilmegen málimetter boıynsha, «Estaı, 134/1» mekenjaıyndaǵy kópqabatty úıdiń aýlasynda belgisiz bireý er adamdy atyp óltirgen.
«Atalǵan fakti boıynsha QR Qylmystyq kodeksiniń 99-baby boıynsha sotqa deıingi tergeý amaldary júrgizilýde. Oqıǵaǵa qatysy bar tulǵany anyqtap, ustaý jónindegi jumystar qolǵa alyndy», - dep habarlady oblystyq polıtsııa departamentinde.
Polıtseılerdiń aıtýlarynsha, oqıǵa týraly aqparat Qylmystyq is-júrgizý kodeksiniń 201-babyna sáıkes, tergeý múddelerin qorǵaý maqsatynda jarııalanbaýda.
