Pavlodarda kópqabatty turǵyn úıdiń shatyrynan sekirmek bolǵan jigit qutqaryldy
PAVLODAR. QazAqparat - Pavlodar qalasynyń polıtsııasyna Qudaıberdıev kóshesinde jigit úıdiń tóbesinen sekirmek bolǵany týraly habarlama kelip tústi, dep habarlaıdy QazAqparat Ravlodarnews.kz -ke silteme jasap.
Oblystyq polıtsııa departamenti baspasóz qyzmetiniń málimeti boıynsha, oqıǵa ornyna dereý avtopatrýlder men jedel tergeý toby jiberildi.
- Patrýldik polıtsııa batalonynyń qyzmetkerleri Azamat Mustafın men Áset Tameshev jas jigittiń karnızdiń shetinde turǵanyn anyqtady. Tártip saqshylarynyń sózine qulaq aspaǵan. Inspektorlar kásibı túrde áreket etti, olar úshin eń bastysy jigitti oılanbaı jasalǵan qadamnan kóndirý boldy, - dedi Pavlodar qalasy patrýldik polıtsııa batalonynyń komandıri Renat Sharıpov.
Jigit polıtseılerdiń sózin tyńdamaǵan jáne qarsylyq tanytqan. Biraq uzaq kelissózderden keıin polıtseıler pavlodarlyqty qutqaryp qaldy.
Inspektorlarmen áńgimelesý barysynda ol óziniń jeke ómirindegi problemalarǵa baılanysty osyndaı qadamǵa barǵanyn aıtty.
- Biz onymen 20 mınýt sóılestik, biraq sol sátte men úshin ár mınýt sheksiz bolyp kórindi. Bul kóz aldyńyzda bolǵan kezde jaǵdaıdy júregińizge jaqyn qabyldamaý múmkin emes. Men oǵan eshkimi joq jetim balalar týraly aıta bastadym, al ol bolsa, otbasylyq janjalǵa bola ómirimen qosh aıtyspaq bolǵan. Óıtkeni, ómirdegi eń basty baılyq - otbasy. Ol karnızdiń shetinen alystaı bastady jáne ony bul áreketke ne ıtermelegeni týraly aıtty. Keıin telefon surap, aǵasyna qońyraý shaldy. Ol ózi úshin durys qorytyndy shyǵaryp, barlyǵyn otbasymen birge sheshedi dep úmittenemin, - dedi Áset Tameshev.
Polıtsııa jigittiń ata-anasymen birge úıine ketkenin habarlady.
