Pavlodarda kópqabatty úılerdiń 80%-dan astamy jylý qabyldaýǵa daıyn
PAVLODAR. KAZINFORM - Turǵyn úılerdiń kóbinde júıelerdi qysymmen tekserý jáne jýý jumystary júrgizilgen. Daıyn úılerdiń kórsetkishin aıdyń sońyna deıin 90%-ǵa deıin jetkizý josparlanǵan.
Oblys ákiminiń baspasóz qyzmeti qazirgi ýaqytta Pavlodar qalasyndaǵy kópqabatty turǵyn úılerdiń 80 %-dan astamy jylý qabyldaýǵa tolyq daıyn ekenin málim etti. Olarda júıelerdi qysymmen tekserý jáne jýý jumystary júrgizilgen. Aıdyń sońyna deıin bul kórsetkishti 90%-ǵa deıin jetkizý josparlanyp otyr.
- Energetıka, turǵyn úı-kommýnaldyq sharýashylyq jáne kommýnaldyq qyzmetter basqarmasynyń deregi boıynsha qazirgi ýaqytta jylýmen jabdyqtaý obektilerindegi jelilerdiń 75%-y jóndeldi, qazandyqtar men jylý magıstraldarynda jumystar jalǵasyp jatyr. Júrgizilip jatqan jumystardyń arqasynda tehnologııalyq aqaýlardyń sany aıtarlyqtaı tómendedi. Ótken maýsymmen salystyrǵanda apattyq jaǵdaılardyń sany 1,5 ese azaıdy,-dep málimdedi oblys ákiminiń baspasóz qyzmetinen.
Qazir Pavlodarda aldaǵy jylý berý maýsymy aldynda jelilerge qaıtara synaq júrgizý qolǵa alynǵan. Qalanyń ońtústik bóliginde gıdravlıkalyq synaqtar aıaqtaldy. Olardyń qorytyndysy boıynsha 65 aqaý anyqtaldy, onyń 19-y magıstraldyq jelilerde. Aqaýlardy joıý boıynsha jumystar jalǵasyn tapqan. Búgingi tańda 13 aqaý joıyldy. Bul jumystarǵa 40 avarııalyq brıgada jumyldyryldy.
Eske sala keteıik, Úkimet Oraldyń jylý magıstralin rekonstrýktsııalaýǵa 2,5 mlrd teńge bóldi.