Pavlodarda kópbalaly ana sottyń kómegimen baspana kezegine qaıta qoıyldy

PAVLODAR. KAZINFORM — Eki jyl buryn áıel adamǵa kezegi boıynsha ákimdik jer úı bergen. Alaıda turǵyn densaýlyq jaǵdaıyna baılanysty úıge pesh jaǵa almapty. Ol múgedektigi bar jandarǵa qolaıly baspana taýyp berýdi suraǵanymen ákimdik bas tartqan.

Belgili bolǵandaı, kóp balaly ana K. memlekettik turǵyn úı qorynan turǵyn úıge muqtaj tulǵalar retinde uzaq ýaqyt boıy esepte turǵan. 2022 jyly ákimdik oǵan Pavlodar qalasy Kenjekól aýylynda peshpen jylytylatyn jańa úıden páter berilgen. Alaıda ol úıde sýmen jabdyqtaý jáne káriz boıynsha kóptegen máseleler anyqtaldy.

2023 jyly K. múgedek dep tanylyp, dárigerler oǵan fızıkalyq júktemen aınalysýǵa bolmaıtynyn eskertken. Sonyń saldarynan talap qoıýshynyń peshti jaǵýǵa fızıkalyq turǵydan múmkindigi bolmaı qalǵan.

«K. jergilikti ákimge turǵyn úı kezegin qalpyna keltirý nemese múgedek mártebesine sáıkes basqa turǵyn úı berý týraly ótinishimen júgingen. Biraq ákimdiktegiler ony qanaǵattandyrýdan bas tartqan. Іsti qaraý barysynda sot ádildik pen aqylǵa qonymdylyq qaǵıdattarynyń, sondaı-aq ákimshilik is júrgizý tártibiniń buzylýyn anyqtady», - dep habarlady oblystyq sottyń baspasóz qyzmetinen.

Sot sheshimimen jaýapker men talap qoıýshy arasyndaǵy páterdi jaldaý sharty buzyldy. K.-nyń múgedektik mártebesine sáıkes, 2014 jyldyń 27 maýsymynan kópbalaly otbasy sanaty retinde tirkelgen kezden bastap memlekettik turǵyn úı qorynan baspana alý kezegi qalpyna keltirildi. Sondaı-aq sottyń sheshimimen jergilikti atqarýshy bılik múgedek jandy sáıkes baspanamen qamtamasyz etýge májbúrlendi.

Eske sala keteıik, jeti jasar Mılananyń ólimine sebepker bolǵan qyzdyń anasy 20 jylǵa, er adam ómir boıyna bas bostandyǵynan aıyryldy.