Pavlodarda kóp qabatty úıden órt shyǵyp, 47 adam evakýatsııalandy
PAVLODAR. QazAqparat – Pavlodar qalasynda kóp qabatty úıdegi páterde aǵash qurylǵylar janǵan, dep habarlaıdy Pavlodarnews.kz.
Bul týraly oblystyq TJD baspasóz qyzmeti málim etti.
- 28 tamyz kúni saǵat 01:24-te Pavlodar qalasy, Akademık Bekturov kóshesi, 111 mekenjaıynda bes qabatty úıde órt shyqqany týraly qońyraý tústi. Birinshi qabattaǵy páterde úı zattary, jıhazdar, terezeniń aǵash jaqtaýlary otqa oranǵan. Jalyn 25 sharshy metr aýmaqty sharpyǵan. Órt saǵat 02:06-da sóndirildi, - dedi baspasóz qyzmetinde.
TJD qyzmetkerleri podezden 47 adam, onyń ishinde 7 balany evakýatsııalaǵan. Oqıǵa ornyna 17 qyzmetker men 5 tehnıka jumyldyryldy.
- Zardap shekken adamdar joq. Tilsiz jaýdyń shyǵý sebebi anyqtalyp jatyr, - dedi departamentte.
