Pavlodarda kondıterlik fırmanyń quımaǵynan tórt adam ýlanyp qaldy

PAVLODAR. KAZINFORM - Ýlanǵan turǵyndardyń barlyǵy aýrýhanaǵa jatqyzyldy. Olardyń ekeýi salmonellez ınfektsııasyn juqtyrǵany belgili boldy. 

Belgili bolǵandaı, ýlanǵandardyń barlyǵy ónimdi bir jerden satyp alǵan. Pavlodar qalalyq sanıtarııalyq-epıdemıologııalyq baqylaý basqarmasynyń mamandary ýlaný faktisi boıynsha quımaq satylǵan saýda núktesin tekserip shyqqandaryn, birqatar zańbuzýshylyq tirkelgenin málimdedi.

«Quımaqtan ýlaný faktisi boıynsha 4 adamnyń shaǵymy tirkeldi. Tutynýshylardyń barlyǵy ónimdi Akademık Shókın kóshesi, 100/1 mekenjaıynda ornalasqan saýda núktesinen satyp alǵan. Olardyń ekeýinen salmonellez juqpasy anyqtalyp, aýrýhanaǵa jatqyzylǵan. Pavlodar qalalyq sanıtarııalyq-epıdemıologııalyq baqylaý basqarmasy atalǵan oqıǵa boıynsha óz quzyret sheginde jospardan tys tekserý júrgizdi. «Eco bazaar» saýda úıiniń atalǵan ónim túrleri satylatyn núktesi tekserilip, sanıtarııalyq-epıdemıologııalyq talaptardyń buzylǵany anyqtaldy. Tekserý qorytyndysy boıynsha kásipkerlik nysanyndaǵy sapany baqylaıtyn mamanǵa qatysty ákimshilik shara qabyldanyp, kemshilikterdi tez arada joıý týraly uıǵarym berildi», - dep habarlady qalalyq sanıtarııalyq-epıdemıologııalyq baqylaý basqarmasynan.

Qazirgi ýaqytta atalǵan ónim túri satylymnan alynyp tastalǵan.

Eske sala keteıik, buǵan deıin Ekibastuzdaǵy bir meıramhanada qonaqtardyń jappaı ýlanýy tirkelgen edi.