Pavlodarda kómirqyshqyl gazynan ýlanǵan eki bala aýrýhanaǵa tústi
PAVLODAR. KAZINFORM — Tereńkól aýdanynda peshti paıdalaný kezindegi qaýipsizdik talaptarynyń saqtalmaýy saldarynan eki bala kómirtek qyshqylynan ýlanyp qalǵan. Olar qazirgi ýaqytta aýrýhanada em qabyldap jatyr.
Oqıǵa 6 qazan kúni bolǵan. Óńirlik tótenshe jaǵdaılar departamentiniń málimetinshe, 14 jáne 11 jastaǵy balalar kómir jaǵylatyn peshti paıdalaný kezinde órt qaýipsizdigi talaptarynyń buzylýy saldarynan kómirqyshqyl gazynan ýlanǵan. Peshtiń tútin shyǵaratyn murjasy ýaqtyly tazalanbaǵan.
Balalardyń basy aýyryp, júrekteri aınyǵannan keıin áýeli Tereńkól aýdandyq aýrýhanasyna júgingen. Keıin olar oblystyq balalar aýrýhanasyna jetkizilgen.
— Balalardy kezekshi pedıatr qarap, baqylaý jáne em qabyldaý úshin somatıkalyq bólimge jatqyzdy. Qazirgi ýaqytta jaǵdaılary turaqty, — dep habarlady Pavlodar oblystyq balalar aýrýhanasy.
Emdeý mekemesiniń málimetinshe, jyl basynan oblysta 12 bala kómirqyshqyl gazynan ýlanyp, medıtsınalyq kómekke júgingen. Onyń ishinde 6 jaǵdaı qyrkúıek aıynda tirkelgen.
Mamandar peshti paıdalaný kezinde qaýipsizdik talaptaryn saqtap, tútin murjalaryn ýaqytyly tazalaýdyń mańyzdylyǵyn eskertedi.
Eske sala keteıik, Shymkentte jylytý maýsymynda 12 adam gazdan ýlanyp kóz jumdy.
