Pavlodarda kómirdiń kenishten bosatý baǵasy ózgerdi

Ertis-Baıan óńiri — Qazaqstan boıynsha kómir óndiriletin negizgi aımaqtardyń biri. Qazirgi ýaqytta oblys aýmaǵynda kómir óndiretin bes kásiporyn jumys isteıdi. Atap aıtqanda, «Maıkóben-Vest» AQ, «Bogatyr Kómir» JShS, «ÝgolSeverSnab» JShS, «EEK» AQ-nyń «Shyǵys» kenishi jáne «Agrensor Energo» JShS-niń «11 óris» ýchaskesi bar.

Kómirge qajettilik artyp keledi

Oblystyq energetıka jáne turǵyn úı-kommýnaldyq sharýashylyq basqarmasynyń basshysy Erjan Imanzaıypovtyń málimetinshe, 2025-2026 jyldardaǵy jylytý maýsymynda óńirdiń áleýmettik salasy men turǵyndaryn qamtamasyz etý úshin shamamen 651 myń tonna kómir jetkizilgen. Al bıyl jylytý maýsymyna qajettilik birshama joǵary. Jalpy kólemi 661 myń tonna qatty otyn satyp alý josparlanǵan. Onyń 245 myń tonnasy bıýdjettik uıymdarǵa, 416 myń tonnasy jeke sektorǵa baǵyttalady, ıaǵnı ótken maýsymmen salystyrǵanda josparlanǵan jalpy kólem shamamen 10 myń tonnaǵa artyp otyr. Deıturǵanmen 2024 jylmen salystyrǵanda kómir tutyný kólemi birden 125 myń tonnaǵa óskenin baıqaýǵa bolady. Aldyńǵy jyly oblys qysqa ýaqytta 536 myń tonna tutynǵan. Aımaqta jeke sektor tarapynan suranystyń kúrt ósip kele jatqanyn baıqaýǵa bolady. Máselen, 2024 jyly jeke sektorǵa 326 myń tonna satylsa, eki jyl ishinde suranys 90 myń tonnaǵa ulǵaıyp otyr.

Búginde óńirdegi bıýdjettik uıymdarǵa shamamen 170 myń tonna, ıaǵnı josparlanǵan kólemniń 70 paıyzǵa jýyǵy jetkizilgen. Basqarma málimetinshe, qazirgi ýaqytta barlyq áleýmettik nysandarda qatty otynnyń negizgi qajetti qory qamtamasyz etilgen. Áleýmettik nysandardyń ishinde aıtarlyqtaı kólem bilim berý salasyna tıesili — 90,4 myń tonna.

Kómir baǵasynyń ósýi kimderge salmaq salady?

Pavlodar oblysyndaǵy kómir baǵasyn turaqtandyrý maqsatynda jergilikti atqarýshy organdar jyl saıyn «Maıkóben-Vest» AQ jáne «Bogatyr Kómir» JShS-men ózara yntymaqtastyq týraly memorandým jasaıdy. Qujattyń negizgi maqsaty — jylytý maýsymynda qatty otyn tapshylyǵyna jol bermeý jáne áleýmettik mańyzy bar kómir baǵasyn turaqtandyrý.

— Ótken jylytý maýsymynda avtokólik arqyly bosatylatyn kómirdiń bir tonnasynyń baǵasy «Maıkóben-Vest» AQ-da 9 myń teńge bolsa, «Bogatyr Kómir» JShS-de 5 611,2 teńge bolǵan. Al bıyl kúzde belgilengen baǵa kelesideı: «Maıkóben-Vest» AQ — 9 611,76 teńge; «Bogatyr Kómir» JShS — 5 811,2 teńge, — dep habarlady basqarmadan.

Osylaısha, «Maıkóben-Vest» kómiriniń tonnasy 611,76 teńgege nemese shamamen 6,8 paıyzǵa, al «Bogatyr Kómir» óniminiń baǵasy 200 teńgege nemese shamamen 3,6 paıyzǵa qymbattaǵany baıqaldy.

«Bogatyr Kómir» kenishiniń kómiri tek energetıkalyq nysandarǵa arnalǵan. Sondyqtan kómiriniń qyzýy negizinen jeke úılerdi jylytýǵa yńǵaıly «Maıkóbe» kenishindegi tarıftiń ózgerýi jeke tutynýshylarǵa aıtarlyqtaı salmaq túsiretinin baıqaýǵa bolady. Bul baǵalar kenishten bosatylǵanda ǵana qoldanylady. Al kómirdiń jetkizý shyǵyndaryn jol qashyqtyǵyna oraı eseptegende onyń quny birshama qymbattaıdy. Keıbir shalǵaı aýyldarǵa jetkizilgende túpki qunynan eki ese joǵary baǵaǵa satylady.

Atap óterligi, bıyl Pavlodar oblysynda kómirdi jeke sektor men áleýmettik nysandarǵa jetkizýmen 20-dan astam óńirlik operator aınalysady. Olar kómirdi bekitilgen baǵamen jetkizý, saqtaý jáne ótkizý jumystaryna jaýapty.

Eske sala keteıik, buǵan deıin ShQO-ǵa jylytý maýsymyna 3 mln tonnadan astam kómir qajet ekenin jazǵan edik.