Pavlodarda komaǵa túsip qalǵan úsh jasar qyzdyń jaǵdaıyna baılanysty tekserý júrip jatyr

Bul týraly Pavlodar oblysynyń densaýlyq saqtaý basqarmasynyń basshysy Ermek Kýchýkov málimdedi.

Onyń aıtýynsha, balanyń jaǵdaıy óte aýyr. Jetkinshekti qutqarý úshin Almatydan bas shtattan tys balalar reanımatology shaqyrylǵan.

— Qyz bala atalǵan klınıkaǵa úshinshi ret barǵan. Protsedýra kezinde oǵan ınektsııa jasalmaǵan jáne jansyzdandyratyn dáriler qoldanylmaǵan. Balanyń jaǵdaıy nasharlaǵan soń jedel járdem shaqyrylyp, ol oblystyq balalar aýrýhanasyna jetkizilgen. Qyz birden jansaqtaý bólimine jatqyzylǵan, — deıdi ol.

Qazirgi ýaqytta bala komada jatyr jáne ókpeni jasandy tynys aldyrý apparatyna qosylǵan. Dárigerler kún saıyn konsılıým ótkizip, naýqastyń jaǵdaıyn baqylaýda ustap otyr. Basqarma basshysynyń málimetinshe, aýrýhana qajetti medıtsınalyq jabdyqtarmen jáne dári-dármekpen tolyq qamtamasyz etilgen.

— Ata-anasymen kún saıyn sóılesip, balanyń jaǵdaıy týraly habarlap otyramyz. Anasy únemi aýrýhanada júr. Men de balany kún saıyn ózim baryp kóremin. Ata-anasy úshin bul óte aýyr jaǵdaı, — deıdi Ermek Kýchýkov.

Onyń sózinshe, QR Densaýlyq saqtaý mınıstrliginiń tapsyrmasy boıynsha óńirlik Medıtsınalyq jáne farmatsevtıkalyq baqylaý departamenti patsıenttiń medıtsınalyq kómek alý barysyna qatysty jospardan tys tekserý júrgizip jatyr. Sonymen qatar qyzmettik tergeý bastalǵan.

Quqyq qorǵaý organdary stomatologııalyq klınıkadaǵy barlyq beınejazbany tárkilegen. Medıtsınalyq qyzmetkerlerdiń áreketine nemese áreketsizdigine quqyqtyq baǵa berilmek.

Eske sala keteıik, Pavlodarda stomatologııalyq em kezinde jaǵdaıy kúrt nasharlaǵan úsh jastaǵy bala jansaqtaý bólimine tústi.