Pavlodarda kolonııaǵa jiberilgen shokolad ishinen uıaly telefon tabyldy
PAVLODAR. KAZINFORM — Pavlodar oblysynda Qylmystyq-atqarý júıesi departamenti men 6679 áskerı bóliminiń qyzmetkerleri № 46 ortasha qaýipsizdik mekemesine tyıym salynǵan zattardy ótkizýdiń eki dereginiń jolyn kesti.
Zańsyz áreketter respýblıkalyq «Tosqaýyl» jedel-profılaktıkalyq is-sharasy barysynda anyqtalǵan.
— Alǵashqy oqıǵa sálemdemelerdi qabyldaý bólmesinde bolǵan. Pavlodar qalasynyń turǵyny sottalǵan tanysyna ákelgen sálemdemeni tekserý kezinde qyzmetkerler shokolad qaptamasynyń ishine sheber jasyrylǵan uıaly telefondy taýyp aldy, — dep habarlady Qylmystyq-atqarý júıesi departamentinen.
Al arada bir saǵat ótkende baqylaý-ótkizý beketinde óndiristik aımaqqa aǵash materıaldaryn tasymaldap bara jatqan júk kóligi tekserilgen. Kabınany qaraý barysynda jolaýshy oryndyǵynan symsyz qulaqqaptar tabylyp, tárkilengen.
— Eki quqyq buzýshyǵa qatysty QR Ákimshilik quqyq buzýshylyq týraly kodeksiniń 481-baby boıynsha ákimshilik hattamalar toltyryldy. Jınalǵan materıaldar protsestik sheshim qabyldaý úshin sotqa joldanady. Tekserý sharalary tolyqtaı beınetirkegishke túsirildi, — delingen departamenttiń aqparatynda.
Departament ókilderi túzeý mekemeleriniń aýmaǵyna kez kelgen baılanys quraldary men elektrondy qurylǵylardy zańsyz jetkizý áreketi úshin ákimshilik jaýapkershilik qarastyrylǵanyn eskertedi.
Eske sala keteıik, Almatyda qapqa jasyrylǵan qarý-jaraq tabyldy.
