Pavlodarda kolonııaǵa telefon men SIM-kartany tsement arasyna jasyryp kirgizbek bolǵan

PAVLODAR. KAZINFORM - №45 túzeý mekemesine áldebireýler iri kólemdegi baılanys quraldaryn tsement qaptaryna salyp, jasyryn túrde ótkizbekshi bolǵan. Bul týraly Ulttyq ulannyń «Shyǵys» óńirlik qolbasshylyǵy baspasóz qyzmetiniń jetekshisi Baǵdat Amangeldi habarlady.

Onyń aıtýynsha, tyıym salynǵan zattar «Eńbek» RMM-ge tıesili «Gazel» júk kóligin metall izdegishpen tekserý barysynda anyqtalǵan. Ózge qurylys zattarymen birge júk kóliginiń ortasynda jınalyp qoıylǵan tsementti qaptar Ulttyq ulan sarbazdarynyń kúdigin týdyrǵan.

«Álgi qaptardy ashýǵa, tekserýge jáne tolyqtaı qarap shyǵýǵa eki saǵattaı ýaqyt jumsaldy. Tyıym salynǵan zattar ár qapta bolǵan», deıdi 6679 áskerı bóliminiń qaraýyl bastyǵy, aǵa serjant Qaırat Sırajev.

Barlyǵy 26 SIM-karta, 3 uıaly telefon, 13 symsyz jáne 4 ádettegi qulaqqap, 13 qýattaýǵa arnalǵan qorek blogi, 24 USB-kabel, 4G ALTEL qurylǵysy, statsıonarly Wi-Fi roýter jáne qaltaǵa salýǵa arnalǵan 3 Wi-Fi roýter tabyldy.

Atalǵan zattar men qurylǵylardy jóneltýshiler jaıly jáne olardyń kimge baǵyttalǵany týraly aqparat joq.