Pavlodarda kólikterge jol kórsetken aýyl muǵalimi tósbelgimen marapattaldy
ASTANA. KAZINFORM — QR Oqý-aǵartý mınıstrliginde aqtútek boranda erekshe erlik kórsetken ustaz Marııa Bedrınaǵa qurmet kórsetildi. Bul týraly vedomstvonyń baspasóz qyzmeti jarııalady.
Mınıstr Juldyz Súleımenova aýyl muǵaliminiń keýdesine «Bilim berý isiniń qurmetti qyzmetkeri» tósbelgisin taqty.
Merekelik shara aıasynda salanyń damýyna úles qosyp júrgen vedomstvo mamandary nazardan tys qalmady. Atap aıtqanda, mınıstrliktiń bes qyzmetkerine «Bilim berý isiniń qurmetti qyzmetkeri» tósbelgisi tabys etildi. Juldyz Súleımenova óz sózinde elimizdegi oń ózgerister men Memleket basshysynyń bastamasymen júzege asyp jatqan bilim salasyndaǵy irgeli reformalarǵa toqtaldy.
— Elimizde kóktem merekesi qarsańynda Konstıtýtsııamyz jańaryp, bul tarıhı qadam áz Naýryzǵa ulasyp jatyr. Osydan jeti jyl buryn Memleket basshysy Qasym-Jomart Toqaevtyń bastamasymen qolǵa alynǵan irgeli reformalardyń ıgiligin búginde ustazdar qaýymy men osy salanyń jumysyn úılestirip júrgen bilim salasynyń mamandary anyq kórip, qýanýdamyz. Sizderdiń eńbekterińiz urpaq tárbıesine tikeleı qatysty ári el bolashaǵyn aıqyndaıdy. Osynaý kóktem merekesinde barshańyzǵa alǵys aıta otyryp, eńbekterińizge jemis tileımin, — dedi sala mınıstri.
Eske sala keteıik, Marııa Bedrına boranda qar qursaýynda qalǵan avtokolonnaǵa jol kórsetý úshin 4 shaqyrymdaı jaıaý júrip, adasyp qalǵan azamattardy qaýipsiz jerge aparǵan bolatyn. Aýyl muǵalimi Pavlodardaǵy mektepterdiń birinde matematıka jáne ınformatıka páninen sabaq beredi.
