Pavlodarda kólik qaýipsizdigi talaptaryn saqtamaǵan zerthanaǵa aıyppul salyndy

PAVLODAR. KAZINFORM — Pavlodar qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty «Tulpar» avtotehnıkalyq quraldardyń mamandandyrylǵan synaq ortalyǵy» JShS Qazaqstan Respýblıkasynyń akkredıtteý jáne tehnıkalyq retteý salasyndaǵy zańnamasyn buzǵany úshin kináli dep tanydy. 

Jospardan tys tekserý barysynda uıym HOWO markaly avtobeton aralastyrǵyshtarǵa jáne SHIFENG markaly samosvalǵa mindetti synaqtar júrgizbesten kólik quraldary konstrýktsııasynyń qaýipsizdigi týraly kýálikterdi (KQKQTK) resimdegeni anyqtaldy. Kólik quraldaryn tekserý ýyttylyqty tómendetý júıeleriniń joqtyǵyn anyqtady (AdBlue suıyqtyǵyn berýdi baqylaý júıesi, AdBlue sorǵysy jáne berý saptamasy), bul Keden odaǵynyń «Dońǵalaqty kólik quraldarynyń qaýipsizdigi týraly» tehnıkalyq reglamentiniń (KO TR 018/2011) talaptaryn buzý bolyp esepteledi.

Nátıjesinde sot «Tulpar» avtotehnıkalyq quraldardyń mamandandyrylǵan synaq ortalyǵy» JShS-niń «Ákimshilik quqyq buzýshylyq týraly» Kodekstiń 415-1-baby 1-bóliginiń 1) tarmaqshasy boıynsha is-áreketterin saralap, 503 958 teńge kóleminde aıyppul túrinde ákimshilik jaza taǵaıyndady. Qosymsha sot qaýlysymen lıtsenzııalanatyn qyzmet túriniń kishi túri bóliginde — alty aı merzimge N2 jáne N3 sanattaǵy avtokólik quraldary bóliginde Ónimdi synaý boıynsha akkredıtteý attestatynyń qoldanylýy toqtatyldy.

Sot sheshimi nátıjesinde «Tulpar» avtotehnıkalyq quraldardyń mamandandyrylǵan synaq ortalyǵy» JShS alty aı ishinde N2 jáne N3 sanattaǵy avtokólik quraldaryn synaýdy júzege asyrýǵa quqyly emes.