Pavlodarda kólik qaqqan jaıaý júrginshi qaza tapty
PAVLODAR. QazAqparat -Jol-kólik oqıǵasy qaladaǵy Nazarbaev dańǵylynda bolǵan, dep habarlaıdy pavlodarnews.kz.
Oblystyq densaýlyq saqtaý basqarmasynyń málimdeýinshe, oqıǵa ornyna kelgen jedel járdem brıgadasy áıel adamnyń qaza tapqanyn anyqtaǵan. - Nazarbaev dańǵyly, 200 úıdiń mańynda jol-kólik oqıǵasy oryn alǵany týraly qońyraý tústi. Jedel járdem 4 mınýttyń ishinde jetti. Ókinishke oraı, oqıǵa ornyna kelgende brıgada jaıaý júrginshiniń bıologııalyq ólimin anyqtady, - dedi basqarmada.
Áıeldiń jasy 60 shamasynda. Ol alǵan jaraqattarynan kóz jumǵan. Oqıǵa orny túsirilgen beınejazba áleýmettik jelilerde taraldy. Jazbada áıel adamnyń denesi jaıaý júrginshiler jolaǵynan birneshe metr qashyqtyqta jatqany baıqalady.