Pavlodarda kóligin aǵash basyp qalǵan júrgizýshi ákimdikten 4 mln teńge óndirip aldy
ASTANA. KAZINFORM — Pavlodarda kóliginiń ústine aǵash qulaǵan turǵyn qalalyq ákimdikti sotqa berip, jeńip shyqty.
Oqıǵa 2025 jyldyń qazan aıynda bolǵan. JETOUR X50 kóliginiń ústine aǵash butaǵy qulap, zaqymdalǵan.
Osydan keıin kólik ıesi Pavlodar qalasynyń turǵyn úı-kommýnaldyq sharýashylyǵy bólimi men páter ıeleri kooperatıvine qarsy sotqa aryz túsirgen. Mamandar júrgizgen baǵalaý qorytyndysyna sáıkes, materıaldyq shyǵyn kólemi 4 mıllıon teńge bolǵan.
Sot barysynda aǵash ósken jer telimi ortaq paıdalanýdaǵy aýmaqqa jatatyny jáne memlekettik menshikte ekeni anyqtaldy. Osyǵan baılanysty jasyl jelekterdi kútip-ustaý men qorǵaý mindeti ýákiletti organǵa júktelgen.
— Sot aǵash butaǵynyń qulaýy aǵashtyń tıisti deńgeıde kútip-baptalmaǵanyn kórsetedi degen qorytyndyǵa keldi. Al páter ıeleri kooperatıvi bul is boıynsha tıisti jaýapker retinde tanylǵan joq, — dep habarlady Pavlodar oblystyq soty.
Memlekettik organ ókilderiniń sol kúni aýa raıy qolaısyz bolǵany jáne ol týraly eskertý jarııalanǵany jaıly ýájin sot jaýapkershilikten bosatýǵa negiz retinde qabyldamady.
Birinshi satydaǵy sot kólik ıesiniń talabyn tolyq qanaǵattandyryp, qalalyq turǵyn úı-kommýnaldyq sharýashylyǵy bólimin 4 mıllıon teńge ótemaqy tóleýge mindettedi. Keıin apellıatsııalyq sot alqasy bul sheshimdi ózgerissiz qaldyrdy.
Aıta keteıik, buǵan deıin aqmolalyq júrgizýshiler kameralardy qalaı aldap júrgeni jaıly jazǵan edik.
Kamıla Taıtóleý
