Pavlodarda qoqystyń qasynan tabylǵan bala salmaq qosyp keledi
ASTANA. QazAqparat - Pavlodarda kópqabatty turǵyn úıdiń aýlasyndaǵy qoqys konteıneriniń qasynan tabylǵan balanyń jaǵdaıy turaqty, dep habarlaıdy pavlodarnews.kz.
Bul týraly agenttikke oblystyq mamandandyrylǵan Balalar úıiniń basshysy Sandýǵash Smaǵulova aıtqan.
«Ul bala bizdiń mekemege qanaǵattanarlyq jaǵdaıda tústi, - deıdi ol. - Qazirgi tańda shırap, kúlimsireı bastady. 70 mıllılıtr sút qospasyn kún saıyn árbir úsh saǵatta tolyq taýysady. Júregi men basyna ýltra dabystyq zertteý júrgiziledi. Salmaǵy - 3416 gramm, boıy - 52 sm. Osy ýaqytqa deıin bolǵan oblystyq perınataldyq ortalyqta oǵan Damır degen esim bergen, tegin Dúısenbek dep jazǵan. Sebebi dúısenbi kúni tabylǵanyna baılanysty osylaı ataýdy jón kórgen».
Sandýǵash Smaǵulovanyń aıtýynsha, bul memlekettik mekemede bir jasqa deıingi 28 sábı bar. Onyń 19-y - ata-analarynyń ótinishi boıynsha ýaqytsha ornalastyrylǵan bolsa, qalǵandary - ata-anasy bas tartqandar.
«Balanyń týý týraly kýáligin ishki ister departamentiniń aktisiz rásimdeýge quqymyz joq, - deıdi Balalar úıiniń basshysy. - Týǵan-týystary tabylady degen úmittemiz. Bálkim, sol kezde aty-jóni basqasha aýystyrylady. Bala úıinde Damır Dúısenbek tórt jasqa deıin bola alady.
Eske sala keteıik, 29 qańtar kúni jańa týǵan náresteni Shókın-Gagarın kósheleriniń qıylysynda ótip bara jatqan Nazıra Omarova kezdeısoq taýyp alǵan. Jedel járdem sýyq ótý belgilerimen sábıdi oblystyq perınataldyq ortalyqqa jetkizgen.
