Pavlodarda kóktaıǵaqtan 16 adam zardap shekken

PAVLODAR. KAZINFORM — Zardap shekkenderdiń bireýi aýrýhanaǵa jatqyzylǵan. Ózgesi úıge emdelýge jiberildi.

Oblys aýmaǵynda keshe kún kúrt sýytyp, jańbyr aralas jaýǵan qardyń sońy kóktaıǵaqqa ulasty. Kóıtaıǵaqtan turǵyndar zardap shegip, emdeý uıymdaryna habarlasyp jatyr.

— Keshe tańerteńnen bizdiń travmatologııa bólimshesine 80 adam kelgen. Olardyń ishinde 16 adam kóktaıǵaqtan zardap shekkeni anyqtaldy. Jyltyr muzda qatty qulaǵan bir turǵyn aýrýhanaǵa jatqyzyldy. Eger qulaǵan adamda jabyq jáne ashyq súıek synyqtary, býyndardyń shyǵýy, sozylýy, zaqymdanýy kezdesse, birden aýrýhanaǵa qabyldaımyz. Habarlasyp jatqandardyń kóbi zeınet jasyndaǵy adamdar, — deıdi № 1 Pavlodar qalalyq aýrýhanasy travmatologııalyq bólimshesiniń dárigeri Dáýren Smaǵulov.

Dárigerlerdiń sózinshe, muzda qulaý kezinde adamdardyń kóbine basy, kókirek jáne jambas tustary zııan shegedi. Keıbir azamattar qulaǵan soń medıtsına uıymdaryna baryp kórinýdi jón sanamaıdy. Saldarynan alǵan jaraqatyn asqyndyryp alýy múmkin. Sondyqtan kez kelgen jaǵdaıda aq jeleńdilerdiń qabyldaýyna barǵan abzal.
Al óńirlik balalar aýrýhanasy sońǵy bir aptada travmatologııalyq bólimshege muzdan taıyp jyǵylǵan 8 bala habarlasqanyn jetkizdi. Olardyń ekeýi aýrýhanaǵa jatqyzylǵan.

Buǵan deıin Pavlodarda kóktaıǵaq saldarynan 100-den astam adam jaraqat alǵany týraly jazǵanbyz.